ناوەندی هەواڵ

 

کۆمەڵەی مافی مرۆڤی "ئیهەدە" لە شاری ئامەد کۆنگرەیەکی ڕۆژنامەوانی ئەنجامدا و "ڕاپۆرتی چاودێریکردنی پرۆسەی ئاشتی-پەکەکە"ی بۆ ڕای گشتی بڵاوکردەوە. لە ڕاپۆرتەکەدا کە لەلایەن جیهان ئایدین، بەڕێوەبەری گشتی کۆمەڵەی مافی مرۆڤەوە پێشکەش کرا، هەڵسەنگاندن بۆ پرۆسەکە کرا کە لە ١ی تشرینی یەکەمی ٢٠٢٤تا ١ی ​​تەمووزی ٢٠٢٦ بەردەوامی هەیە.

 

ڕاپۆرتەکە لەسەر بنەمای سەرچاوە راست و ڕوونەکان ئامادە کراوە. تیایدا پێشکەوتنی پڕۆسەی ئاشتی و چالاکییەکانی کۆمسیۆنی پەرلەمان و کاریگەری ئەم پرۆسەیە لەسەر مافەکانی مرۆڤ و بواری یاسا هەڵسەنگێندرا. هەروەها لە ڕاپۆرتەکەدا هاتووە، بەهۆی نەبوونی میکانیزمێکی فەرمی بۆ چاودێریکردنی پرۆسەی ئاشتی، کۆمەڵگەی مەدەنی هەوڵی پڕکردنەوەی بۆشاییەکەیان داوە.

 

کۆمەڵەی مافی مرۆڤ ساڵی ٢٠٢٥ی بەم شێوەیە پێناسە کرد: شەڕی چەکداری لەگەڵ پەکەکە کۆتایی هات، بەڵام لە ڕووی مافی مرۆڤ، دیموکراسی، دادپەروەری و ئازادییە بنەڕەتییەکانەوە، ساڵێک بوو پڕ لە گەڕانەوە بۆ دواوە.

 

هەروەها لە ڕاپۆرتەکەدا هاتووە کە لە بوارەکانی سەربەخۆیی دادوەری، سەبارەت بە قەیومەکان، ئازادی ڕادەربڕین و ڕۆژنامەگەری، مافی گردبوونەوە، خۆپیشاندان و مافی ژیان بە جۆرێک گەڕانەوە بۆ دواوە ڕوویداوە.

 

لە ڕاپۆرتەکەدا لە مانگی شوباتەوە تا حوزەیرانی ٢٠٢٦ی وەک "قۆناغی چوار" دەستنیشان کردووە و بەو ئەنجامە گەیشتووە کە "چاوەڕوانی بۆ یاسای چوارچێوە بەردەوام بوو، پێشکەوتنەکان لاواز بوو و لە ١ی تەمموزی ٢٠٢٦ بەدواوە راوەستاوە.

 

کۆمەڵەی مافی مرۆڤ ڕایگەیاند کە بۆ ئاشتییەکی هەمیشەیی ئاگربەست بە تەنیا بەس نییە و داوای کرد کە یاسایەکی چوارچێوەی گشتگیر لە لایەن پەرلەمانەوە دەربکرێت و چاکسازی دیموکراتیک جێبەجێ بکرێت و کۆتایی بە سەپاندنی قەیومەکان بهێنرێت، ئازادی ڕادەربڕین گەرەنتی بکرێت و میکانیزمی ئاشکراکردنی ڕاستییەکان سەبارەت بە تاوانبارانی نەناسراو دابنرێت.

 

هەروەها کۆمەڵەکە پێشنیاری کردووە کە میکانیزمەکانی چاودێری سەربەخۆ بە شێوەیەکی فەرمی بناسرێن، کۆمەڵگەی مەدەنی بەهێزتر بەشداری پرۆسەکە بکات و ئەم پرۆسەیە بە پشتیوانی دامەزراوە جیهانیەکان بەردەوام بێت.

 

لە ڕاپۆرتەکەدا بە ئاماژەدان بە کاریگەریی ڕێبەری گەلی کورد عەبدوڵا ئۆجالانی لەسەر پرۆسەی ڕاوەستاندنی چالاکی چەکداری، هاتووە: ئەو ڕێبەرێكی کاریگەرە کە وایکرد بڕیاری وازهێنانی لە چالاکی چەکداری لە چوارچێوەی ڕێکخستندا قبوڵ بکرێت، لە ئەدەبیاتی چارەسەرکردنی ململانێکاندا ئەکتەرەکان دەتوانن لە بنیاتنانی متمانە و جێبەجێکردنی بڕیارەکاندا ڕۆڵێکی گرنگ بگێڕن، بۆیە ​​پێشنیار دەکرێت ئەم پرۆسەیە لەسەر بنەمای دامەزراوەیی بەڕێوەبچێت و ئەکتەرە پەیوەندیدارەکان لە چوارچێوەی یاساییدا دانیان پێدا بنرێت و پێناسە بکرێن.

 

هەروەها لە ڕاپۆرتەکەدا هاتووە کە پێویستە لە بواری گۆڕانکاری لە یاسای سزادان و پرسی "مافی هیوا" دەستبەجێ هەنگاو بنرێت.

 

لە کۆتایی ڕاپۆرتەکەدا وتراوە: "سەرکەوتنی ئەم پرۆسەیە پەیوەستە بە بەهێزبوونی هاوکاتی ئاسایش، ماف و دیموکراسی و ڕێککەوتنی کۆمەڵایەتیەوە.