یەپەژە: چاپەمەنی ئازاد هەرگیز سەر نەوی ناکات
یەپەژە بۆ بە ئامانج کردنی ڕۆژنامەنووسان گوڵستان تاراو هێرۆ بەهادین ئاماژەی بەوەکرد، تێکۆشانی چاپەمەنی ئازاد لە غوربەتلییەوە تا ئاگری یەڵماز، لە دلۆڤان گەڤەرەوە تا گوڵستان و هێرۆکان خاوەن مێژووییەکی پڕ لە بەرخۆدانە، بۆیە هەرگیز سەر نەوی ناکات.
ناوەندی هەواڵ
لە پاش ڕووداوەکەی ٢٣ی ئاب و بە ئامانج کردنی ئۆتۆمبێلی ڕۆژنامەنووسانی کۆمپانیای چەتر بۆ کاری میدیایی لە ڕێگەی شارۆچکەی سەیدسادق لە سلێمانی لەلایەن دەوڵەتی داگیرکەری تورکیاوە، کە بووە هۆی گیان لەدەستدانی ڕۆژنامەنووسان هێرۆ بەهادین و گوڵستان تارا و برینداربوونی ڕێبین بەکر، ناڕەزایەتی بەرفراوانی لەسەر ئاستی کوردستان و نێودەوڵەتی لێکەوتەوە.
لە درێژەی کاردانەوەکان، ناوەندی ڕاگەیاندنی یەکینەکانی پاراستنی ژن "یەپەژە" ڕاگەیەندراوێکی بڵاوکردەوە.
لە ڕاگەیەندراوەکەدا ئاماژە بەوەکراوە، هێزەکان لە هەرێمی کوردستان و عێراق بۆ لەناوبردنی دەسکەوتەکانی تەڤگەری ئازادی لەگەڵ دەوڵەتی تورکی قڕکەری گەلی کورد، ئەم هێرشە تیرۆریستی و دژە مرۆڤانەیە ئەنجام دەدەن، گوڵستان و هێرۆ لە نزیکەوە ڕاستی هێرشەکانی داگیرکاری دەوڵەتی تورک بۆ سەر باشووری کوردستان و هێزە خیانەتکارەکان و نۆکەرەکانیان، بە کامێرا و پێنووسەکانیان گەیاندە ڕای گشتی، بۆیە گوڵستان و هێرۆ لە ٢٣ی ئاب لە سلێمانی لەلایەن دەوڵەتی تورکەوە ڕووبەڕووی هێرش بوونەوە.
ئاماژە بەوەشکراوە، دەوڵەتی تورک بە بەرچاوی جیهانەوە لەڕێگەی فڕۆکەی بێ فڕۆکەوانەوە هێرش دەکات، پێشەنگانی گەل و سیاسەتمەدار و ئەکادیمی و شەڕڤان و ڕۆژنامەنووسان دەکاتە ئامانج، وەک هەمیشە ڕێکخراو و دەزگاکانی مافی مرۆڤ بەرامبەر ئەم هێرشانەی دەوڵەتی تورک بێدەنگن.