ڕۆنیدا حاجی

 

حەسەکە- دوای ڕووخانی ڕژێمی بەعس، لەگەڵ هاتنی ئیدارەی کاتی سووریا و ڕاگەیاندنی دەستوور؛ کۆمەڵکوژییەکان لە کەناراوەکانی سووریا دەستیپێکرد، ڕوکەن ئەحمەد، ئەندامی پەیوەندی و هاوپەیمانییەکانی سیاسەتی دیموکراتیکی کۆنگرەی ستار سەبارەت بەم بابەتە هەڵسەنگاندنێکی بۆ ئاژانسەکەمان کرد.

 

ڕوکەن ئەحمەد ڕایگەیاند، گەل بۆ پاراستنی ماف و ناسنامەی خۆی هەڵدەستێت و شۆڕشێکیان لە دژی سیستمی تاکلایەنە دەستپێکردووەو وتی: دوای ٥٤ ساڵ خەبات و بەرخۆدان لەلایەن گەلی سووریاوە، ڕژێمی بەعس ڕووخا، گەل بە ڕووخانی ئەم سیستمە خۆشحاڵییەکی زۆریان بەخۆوە بینی، بەو پێیەی سیستمی بەعس کراوە نەبوو بۆ گۆڕانکاری، مافی پێکهاتەکانی پێشێل کرد، ئەم ساتەوەختە هیوای بە گەل بەخشی کە لاپەڕەیەکی نوێ لە سووریا بکرێتەوە و پێکهاتەکان بە شێوەیەکی دیموکراسیانە بژین، بێگومان کاتێک شۆڕش دەستیپێکرد ئامانج پاراستنی سووریایەکی ڕەنگاوڕەنگ بوو کە هەمووان مافی خۆیان هەبێت.

 

'بە هاتنی هەتەشە سووریا بەرەو دۆخێکی مەترسیدارتر و ئاڵۆزتر دەڕوات"

 ڕوکن ئەحمەد ئاماژەی بەوەکرد، هەتەشە دەیەوێت شەڕی ناوخۆ دەستپێبکات و وتی: هیوای گەل لەکارکەوتووە، و دۆخێکی مەترسیدار و تادێت ئاڵۆزتر لە ئارادایە، چونکە ئەو جیهادیانەی هاتنە سەر دەسەڵات لە لیستی تیرۆردادان، مێژووەکەیان پڕە لە کوشتن و ڕفاندن و تاڵانکردنی موڵک و ماڵی گەلی سووریا، بەهۆی ئەوەوە دۆخی سووریا خراپتر و خراپتر دەبێت.

 

"گەلی سووریا پێویستیان بە ئاسایش و سەقامگیری هەیە"

 ڕوکەن ئەحمەد ئاماژەی بەوەکرد، هەتەشە تاوانی جەنگی دژی گەلی سووریا ئەنجام دەدات و وتی: حکومەتی نوێ بڕیاری دا کە هەمووان چەکەکانیان دابنێن بۆ ئەوەی سووریا بەرەو چارەسەری سیاسی هەنگاو بنێت، بەڵام دەبینین ئەوانەی چەکەکانیان دانا کۆمەڵکوژ کراون، خەڵکی سووریا زیاتر پێویستیان بە ئاسایش و سەقامگیری هەیە نەک بونیادنانی سوریایەکی نوێ، حکومەتی نوێ ڕێوشوێنی توندی گرتەبەر، ئەمەش بووە هۆی ئەو کۆمەڵکوژییانەی کە ئەمڕۆ دژی پێکهاتەی عەلەوی ڕوودەدەن، لەم پرۆسەیەدا پێویستمان بە چاودێری نیشتمانی هەیە بۆ ئەم تاوانە جەنگیانە، دەبێت هەموو ئەو لایەنانەی بەشدارن لە تاوانەکانی جەنگدا لێپرسینەوەیان لەگەڵدا بکرێت، تا ئەمڕۆش لە عەفرین، سەرێکانی، گیرێ سپی، کەنارەکانی سووریا پێشێلکاری و تاوانی جەنگ ئەنجام دەدرێت، بەم دۆخە سووریا بەرەو چارەسەر ناڕوات.

 

"ئەگەر دەستوور نەگۆڕدرێت، دۆخەکە شۆڕشێکی نوێ بەدوای خۆیدا دەهێنێت"

ڕوکەن ئەحمەد جەختی لەوە کردەوە کە ئەگەر دەستوورەکە نەگۆڕدرێت، شۆڕشێکی نوێ دەستپێدەکات و وتی: ئەوەی پرسەکە ئاڵۆزتر دەکات، دەستووری نوێیە، لەم قەیرانەدا کە گەل کۆمەڵکوژ دەکرێن، ئەوان تەنها خزمەت بە یەک لایەن دەکەن، ئەمە مەترسییەکی گەورە بۆ سەر سووریا دروست دەکات و بۆ هەموو خەڵکیش قبوڵ ناکرێت، پاراستنی مافەکانمانی تێیدا نابینین و ئێمەش جێگەی خۆمان تێیدا نەگرتەوە، حکومەتی نوێ دەبێت گرنگی بە داواکارییەکانی گەل بدات و هەڵەکانی ئەسەد دووبارە نەکاتەوە گەلی سووریا لێبوردەیی نییە بۆ شەڕ و لێبوردەیی نییە بۆ ستەمی نوێ.

 

"دەبێت دیدگاکەمان وەک یەک بێت، چونکە چارەنووسمان تێکەڵ بووە"

ڕوکەن داوای هاوپشتی و یەکگرتوویی ژنانی سووریای کرد و لە کۆتایی قسەکانیدا وتی: هاودەنگی ژنانی سووریا لەم پڕۆسەیەدا گرنگە، لە شەڕەکاندا ئەوە ژنان بوون کە ئازاریان چەشت و باجیان دا، بۆ ئەوەش شێوازەکانی پاراستن و ڕێکخستن و هاودەنگی و ڕێککەوتنی ژنانی سوریا لە هەموو ڕوویەکەوە پێویستن، لەم کاتەدا، ئێمە زۆرترین پێویستمان بە یەکگرتوویی هەیە بەیەکەوە بەستراوەتەوە، ئێمە ناتوانین بە ئازادی لە باکوور و ڕۆژهەڵاتی سووریا بژین لە کاتێکدا ژنان لە کەناراوەکانی سووریادا کوشتن هەیە، ئەرکێکی گەورە دەکەوێتە سەر شانی ژنانی کورد و هەموو ژنانی باکوور و ڕۆژهەڵاتی سووریا بەو پێیەی ئێمە ئەزموونمان هەیە، با هاوبەشی بکەین و بیپارێزین، بیکەین بە دەستکەوتێک بۆ هەموو ژنانی سووریا، بەم شێوەیە دەتوانین ڕێگری لە سووریایەکی جیهادی و تاکلایەنە بکەین و نەک هەر مافی ژنان بپارێزین، بەڵکو پیاوانیش لەو شوێنەی هۆشیاری ڕەگەزپەرستی و جیهادی و ئایینی ڕزگار بکەین.