مەمیهان هلبین زەیدان

 

وان- شارەوانیی ڕێگای ئارموش لە وان، بە مەبەستی ئەوەی ژنان ژیانێکی تەندروست و چالاک بژین، لە بواری جیاوازدا، لە چالاکیی وەرزشییەوە بگرە تاوەکو هۆشیارکردنەوە لەسەر شێرپەنجە، لە باخچەکانی شارەوە بگرە تاوەکو پشتگیریی یاسایی و دەروونی، چالاکی ئەنجام دەدات، جێگری ئۆزنور ئەڤین، هاوشارەوانی شارەوانیی ڕێگای ئارموش،  هەڵسەنگاندنی خۆی لەسەر خزمەتگوزارییەکانی شارەوانی بۆ تەندروستیی ژنان، لەگەڵ ئاژانسەکەماندا هاوبەش کرد.

 

ئۆزنور ئەڤین ڕایگەیاند، وەک شارەوانی لە ڕۆژی دەستبەکاربوونیانەوە دەستیان بە کارکردن کردووە لەسەر پرسی ژنان، وتی: لەم ڕووەوە تیشکمان خستۆتە سەر زیادکردنی ژمارەی دامەزراوە وەرزشییەکان بۆ ژنان، پەروەردە بۆ هۆشیاری شێرپەنجەی مەمک و جۆرەکانی تری شێرپەنجە ئەنجامدراوە، دوای دوو ساڵ و نیو ژمارەی ئەو هۆڵانەی وەرزش کە کردوومانەتەوە بۆ ئەوەی شێوازێکی ژیانی تەندروست بۆ ژنان دابین بکەین گەیشتووەتە شەش، بە نزیکەی سێ هەزار ژن سوودمەندن لەم هۆڵانە.

 

پەروەردەی بۆ هۆشیاری شێرپەنجەی مەمک

ئۆزنور ئەڤین باسی لە کاری هاوبەش لەگەڵ دامەزراوە تەندروستییەکان کرد سەبارەت بە شێرپەنجەی مەمک و نەخۆشیەکانی تری ژنان و ڕایگەیاند، کە ئەو هەوڵانە بەردەوام دەبن، وتی: لەم دواییانەدا پەروەردە بۆ هۆشیاری شێرپەنجەی مەمکمان ئەنجامدا، بەردەوامین لە پلان و هەوڵەکانمان بۆ ئەمە، لە ناوەندی لەشجوانیمان کارمەند و ڕاهێنەرەکانمان یارمەتی ئەو ژنانە دەدەن کە کێشەی تەندروستییان هەیە یان دەیانەوێت بە شێوەیەکی تەندروست کێشیان زیاد بکەن یان دابەزێنن، پلانمان هەیە لە داهاتوویەکی نزیکدا ناوەندی لەشجوانی لە گەڕەکەکانی تر بکەینەوە، هەروەها وانەکانی یۆگا پێشکەش بە ژنان دەکەین، هەرچەندە زۆر بە تەواوی و بە بەردەوامی نییە، هەوڵ دەدەین ئەم چالاکییانە بە زۆری لە دەرەوە، لەو شوێنانەی کە هەموان دەتوانن بە حەزی خۆیان بەشداری تێدا بکەن، ئەنجام بدەین.

 

ئۆزنور ئەڤین ڕوونیکردەوە، کە پلانیان هەیە توێژینەوەی کاریگەر لەسەر تەندروستی ژنان ئەنجام بدەن و وتی: ئێمە هاوکاری دامەزراوە تەندروستییەکان دەکەین سەبارەت بە شێرپەنجەی مەمک و پلانمان هەیە پشکنینی شێرپەنجە بۆ ژنان لە زۆرێک لە گەڕەکەکان ئەنجام بدەین، هەروەها ژێرخانی بۆ ئەمەش دروست دەکەین.

 

کاریگەری داگیرکردنی زەوی لەسەر تەندروستی

ئۆزنور ئەڤین ڕایگەیاند، کە باخچە شارستانییەکانیش کە لەلایەن شارەوانییەوە وەک بەشێک لە لێکۆڵینەوەکانی ژنان کراونەتەوە، دەکرێت وەک خزمەتگوزارییەکی تەندروستی هەژمار بکرێن، تا ئێستا لە سێ گەڕەکدا باخچە دروستکراون و ٢٠٠ ژن لەم باخچانە سوودمەند دەبن و وتی: کاتی چاندن دەستدان بە خاکدا و کاتی دروێنەکردن چالاکبوون بۆ ژنان باشە، هاوکات ژنان ئەو بەرهەمانەی کە دەیچێن و لەسەر سفرەکانیان دایدەنێن، بۆ زستان ئامادە دەبن، کاتێک هەوڵ دەدەین ئەو شارانە بونیاد بنێین کە ژنان لە هەموو بوارەکاندا چالاکتر بن، خاڵێکی تریش لە بەر چاو دەگرین کە پشتگیری لە ژیانێکی ژینگەیی دەکات، بێ ئەوەی تەندروستیی گشتی پشتگوێ بخەین.

 

پشتگیری بۆ ئەو ژنانەی کە ڕووبەڕووی توندوتیژی دەبن

لە کۆتایی قسەکانیدا، ئۆزنور ئەڤین ڕوونیکردەوە، کە ئەوانیش لەگەڵ ژنان کۆدەبنەوە بۆ پشتیوانی دەروونی پێشکەشدەکەن وتی: ئێمە کارێکی بەردەواممان هەیە بۆ ئەو ژنانەی کە زیانبەرکەوتووی توندوتیژی خێزانی و کۆمەڵایەتین، لەم چوارچێوەیەدا، ئێمە پشتگیری ئەو ژنانە دەکەین کە زیانبەرکەوتووی توندوتیژین، دەیانەوێت جیاببنەوە و داوای پشتیوانی یاسایی بکەن، لە چوارچێوەی ئەو پرۆتۆکۆڵەی لەگەڵ سەندیکای پارێزەرانی وان دامانمەزراندووە، پشتگیری یاسایی پێشکەش دەکەین، تا ئێستا پاڵپشتی پێویستمان پێشکەش بە هەموو ئەو ژنانە کردووە کە داواکارییان پێشکەش کردووە، ڕامانگەیاندووە کە بوونەتە زیانبەرکەوتووی توندوتیژی و پێویستیان بە پشتیوانی یاسایی هەیە بۆ ئەوەی جیاببنەوە، ئێمە کارمەندمان هەیە لە ناوەندەکانی هاوپشتی ژنان کە دەتوانن باسی ئەو کێشانە بکەن کە ژنان ڕووبەڕووی دەبنەوە، لەم ڕووەوە هاوکاری پێویست لە بواری پاڵپشتی دەروونیشدا پێشکەش دەکەین، کە دەتوانرێت لە چوارچێوەی شارەوانیکەدا دابین بکرێت.