ناوەندی هەواڵ

 

سەرلەبەیانی ئەمڕۆ، پۆلیسی دەوڵەتی تورک لە ئامەد بینای کۆمەڵەی توێژینەوەی زمان و کولتووری میزۆپۆتامیا- مەد-دەر، کە چالاکی زمانی کوردی بەڕێوەدەبات، هەروەها دەستی بە سەر بینای پایز پەرتوکدا گرت. لە هەمان کاتدا پۆلیس هێرشی کردە سەر ماڵی چەندین کەس  لە کارمەندانی مەد-دەر.

 

لە ئۆپەراسیۆنەکەدا دەست بەسەر پەرتوکی خوێندن و گۆڤار و هارد دیسکی کۆمپیوتەرەکانی دامەزراوەی کوردیدا گیرا و کۆمەڵێک پەرتوکی ناوەندی پایز پەرتوک دەستی بەسەردا گیرا، گەڕان لە پەرتوکخانەکەدا بەردەوامە.

 

لە چوارچێوەی لێکۆڵینەوەکەدا، بەلقیسا سولەیمانئۆغڵو بیتکین، بەڕێوەبەری "ژین ئارت هونەر" لە ئەزمیر کە چالاکیی فەرهەنگی و هونەری بەڕێوە دەبات، لە ماڵەکەی خۆیدا دەستبەسەر کرا.

 

ئەمە لە کاتێکدایە کە هەر بەرەبەیانی ئەمڕۆ، ٢٤ی ئەیلوول، هێزەکانی دەوڵەتی تورکیا هێرشیان کردە سەر چەندین ماڵ لە ئەستەنبوڵ و ماردین، کە لە ئەنجامدا لانیکەم ٩ کەس دەستەبەر کراون، کە تیایدا بەڕێوەبەرانی پێشووی هەدەپە نەجلە کایە، عەبدولغانی فەریدغۆلاری و یاسەمین هەن.