ناوەندی هەواڵ

 

ئیمام عەلی ڕەحمۆن، سەرۆکی تاجیکستان ئاشکرایکردووە، لەناو ۳٥ یاسادا، کە بەم دواییانە دەرکراون، یاساکانی رێکخستنی ئاهەنگەکان، بەرپرسیارییەتی منداڵان، ڕێگەنەدان بە فرۆشتنی جلوبەرگی بیانی وەک حیجابی ئیسلامی و زیادەڕۆیی نەکردن لە ئاهەنگەکاندا هەن.

 

لە رۆژی ١٩ی حوزەیرانیشدا، لەو ژمارەیە، دوو یاسا لەلایەن پەرلەمانی وڵاتەکەوە پەسەند کراوە، یەکەمیان قەدەغەکردنی جلوبەرگی بیانییە، بەپێی ئەو یاسایە، حیجاب و ئەو جلانەی دیکە کە بەم دواییانە لە وڵاتەکەدا بڵاوبوونەتەوە، قەدەغەکراون.

 

 ئیمام عەلی لەبارەیەوە وتوویەتی: لەبەرکردنی جلی بیانی کە ناوێکی ساختەیان هەیە لەگەڵ حیجابدا، کێشەی دیکە بۆ کۆمەڵگەکەمان دروست دەکات".

 

دووەمیان، قدەغەکردنی ئەو شتانەیە کە پەیوەندی بە جەژنی رەمەزان و قوربانەوە هەیە، بریتییە لە گەڕانی منداڵان ماڵ بە ماڵ بە مەبەستی سڵاوکردن و جەژنەپیرۆزەکردن لێیان، لەبارەی هۆکاری قەدەغەکردنیشییەوە ئاماژە بەوەکراوە کە "نەریتێکی مەترسیدارە و ناپەروەردەییە و هیچ بەهایەکی یاسایی و ئاینی نیە".

 

وابڕیاریشە ئەو کەسانەی سەرپێچی یاساکە دەکەن سزای دارایی بدرێن، سزاکەش لە ۷۰۰ یۆرۆوە دەستپێدەکات بۆ کەسە ئاساییەکان، دەگات بە ٥۰۰۰ یۆرۆ بۆ کارمەندانی حکومی و کاربەدەستانی ئاینی.

 

لە تاجیکستان کە ٩٩%ی دانیشتووانی موسڵمانن، بەپێی داتا فەرمییەکان ساڵانێکە لە دامودەزگا حکومییەکان و قوتابخانەکان قەدەغە کراوە، لە وڵاتدا پیاوان بۆیان نییە ڕیشیان بهێڵنەوە، لە ساڵانی ڕابردوودا بۆ ڕای گشتی ئاشکرا بووە کە هەزاران پیاو لەلایەن پۆلیسەوە لەسەر ڕێگاکان ڕاگیراون و ڕیشیان بە زۆر بڕاوە، حکومەت ئەم پراکتیزەیەی بە ترسی ڕادیکاڵبوون لە ئاسیای ناوەڕاستدا بە شوێنکەوتنی ڕێبازی ئەفغانستان ڕوونکردەوە.