ناوەندی هەواڵ

 

بەڕێوەبەرایەتی ڕاگەیاندن و بە بازارکردنی گەشتوگوزاری سلێمانی ڕاگەیاندنێکی بڵاوکردەوە و ڕایگەیاند، زیاتر لە ١١٣ هەزار گەشتیار لە ماوەی حەوت ڕۆژی ڕابردوودا سەردانی شاری سلێمانی و دەوروبەری کردووە.

 

لە ڕاگەیەندراوەکەدا ئەوەشی بڵاوکردووەتەوە، کە گەشتیاران لە ڕۆژانی جەژن و پێش جەژن لە ناوچە جیاوازەکانەوە سەردانی پارێزگای سلێمانیان کردووە، ٪٨٥ ئەو ۱۱۳ هەزار گەشتیارەی سەردانی شاری سلێمانی و دەوروبەریان کردووە خەڵکى ناوەڕاست و باشورى عێراقن.

 

ئەو گەشتیارانەی لە ماوەی حەوت ڕۆژی ڕابردوو سەردانی شاری سلێمانی و دەوروبەرییان کردووە، بە بۆنەی جەژنی قوربانەوە لە ڕێگەی بازگە، دەروازە سنوورییەکان و فڕۆکەخانەکانەوە هاتوون، لە ٨٥٪ى ئەو گەشتیارانە خەڵکى باشوور و ناوەڕاستى عێراق بوون و ئەوانى دیکەش خەڵکى ئێران و وڵاتانى دیکەى جیهان بوون.

 

لە بەشێکی دیکەی ڕاگەیەندراوەکەدا ئاماژە بەوەشدراوە کە لیژنەکانی بەڕێوەبەرایەتی گەشتوگوزاری سلێمانی ئامادەکاری پێویستیان ئەنجامداوە و پێشوازیان لە گەشتیاران کردووە، شوێنی پێویست بۆ مانەوەیان دابینکراوە و ڕێگری لە درووستبوونی هەر جۆرە پشێوی و گرفتێک کراوە.

 

زیادبوونی ژمارەی گەشتیار بۆ ناو شاری سلێمانی و دەوروبەری لە چەندین ڕووەوە دەتوانێت سوودی هەبێت، لە گەشەسەندنی ئابووری شارەکە، بە بازاڕکردنی زیاتر بۆ بەرهەمە ناوخۆییەکان و ئاشناکردنی زیاتری کولتووری کوردی بە گەشتیارانی بیانی.