ئاگرین حوسێنی

 

دیواندەرە-  ئەمڕۆ دیاردەی زبڵ و خاشاک بووەتە کێشەیەکی کۆمەڵایەتی و تەندروستی، کە جگە لە شێواندنی سیمای شارەکە، کێشەی تەندروستی گشتیشی لێکەوتووەتەوە، لە لایەکی دیکەوە، نەبوونی کولتوور سەبارەت بە جیاکردنەوەی پاشماوە و نەبوونی میکانیزمێکی گونجاو بۆ کۆکردنەوەی پاشماوەی جیاکراوە بووەتە هۆی زیادبوونی دیاردەی زبڵدان، تەنها ئالوودەبووان نین کە بە دەوری زبڵدا دەسوڕێنەوە، بەڵکو ژن و منداڵ و گەنجانیش بەهۆی نەبوونی دامەزراندن و پلاتفۆرمی ئابووری، نەبوونی داهاتی شیاو ڕووبەرووی هەمان دەرئەنجام بوونەتەوە.

 

یەکێک لە ڕۆژە گەرمەکانی مانگی حوزەیران، دیمەنێکی ناخۆش و ئازاربەخش سەرنجی هەمووانی ڕادەکێشا، ژنانی ژێر پێستی زبڵ و خاشاک، ژنێک بە جەستەیەکی ماندووەوە گونییەکی هەڵگرتووە، لە ڕواڵەتی گونیەکەوە ڕوونە کە هیچ شتێکی بەنرخی تێدا نییە، جگە لە هەندێک دەبە و کارتۆن، بەبێ ئەوەی گرنگی سەیرکردنی کەسانی چواردەوری بدات، نیوەی جەستەی لەناو تانکی زبڵدا چەماوەتەوە.

 

کەشوهەوا لەڕادەبەدەر گەرمە و ئەم گەرمایە وایکردووە گازێکی بۆن ناخۆش لە زبڵ و خاشاکەوە لە هەوادا بەرزبێتەوە، بۆیە پیادەکان هەوڵدەدەن ئەودیوی شەقامەکە بەکاربهێنن بۆ بەردەوامبوون لە ڕێگاکەیان بۆ دەربازبوون لەم بۆنە ناخۆشە، بەبێ دەمامک و دەستکێش خەریکی هەڵدانەوە زبڵ و خاشاکەکانە، لەگەڵ نزیکبوونەوە بۆنی تانکی پاشماوەکە بەرگەی ناگیرێت، کاتێک چوومە پێشەوە داوام لێکرد واز لەو کارە بهێنێت و چەند هەنگاوێک دووربکەوێتەوە، ئەویش بە پێکەنینەوە داواکارییەکەی منی قبوڵ کرد.

 

خەدیجە تەمەنی ٥٦ ساڵە، لە یەکێک لە گوندەکانی شاری دیواندرە نیشتەجێیە و دەڵێت، بەهۆی خراپی باری دارایی و کرێچی، ناچار دەبێت پاشماوە کۆبکاتەوە، هەروەها بەهۆی تەمەنیەوە ئەمە تاکە کارێکە کە دەتوانێت بیکات بۆ ئەوەی بژێوی ژیانی پەیدا بکات.

 

بە دەستەکانی فرمێسکەکانی سڕی و وتی: " هاوسەرەکەم مرد و دوو کچ و کوڕێکم هەیە، یەکێک لە کچەکانم کەمئەندامی جەستەییە، هەموو شەوێک کاتژمێر ١٠ دێمە سەر شەقامەکانی دیواندەرە و تاکە ژنم لەم شارەدا زبڵ و خاشاک کۆدەکەمەوە، خەڵکی ئەم شارە زۆر میهرەبانن لەگەڵم و هەمیشە یارمەتیم دەدەن، بەڵام بەڕاستی دەبێت تا کەمەرم لەناو زبڵدانەکاندا بچەمێنمەوە بۆ ئەوەی پارچەیەک نانم دەست بکەوێت."

 

گێڕانەوەی ئازاربەخش کە لەم دواییانەدا لە هەموو شارەکانی پارێزگای سنە گەشەیان کردووە، دیاردەی زبڵ و خاشاک لە شارەکانی کوردستان پرسێکی بچووک بوو، بەڵام سەرەڕای هەڵاوسان و گرانبوونی نرخ و نەبوونی کاری شیاو، تەنانەت ژنانیش پەنایان بۆ زبڵدان بردووە.

 

زبڵ و خاشاک هێمای ئابوورییە کە لەسەر بنەمای ستەمکاری چینایەتی دامەزراوە، ئابووری چینایەتیی هەنووکەیی لە ئێران ڕۆژ بە ڕۆژ دوورتر دەبێتەوە، کۆمەڵگای ئێران بەدەست دابەشبوونی چینایەتی و نایەکسانی داهاتی گشتی لە نێوان بنەماڵەکاندا دەناڵێنێت، کۆمەڵگایەک کە لەم ساڵانەی دواییدا هەژاریی ڕەها لە هەمان کاتدا لەگەڵ سامانی بێسنوور لە شەقام و باڵەخانە و ژینگەکانی دیکەدا دەبینرێت، لە لایەک خێزان هەیە کە شەوانە پێویستیان بە نان هەیە و لە لایەکی تریش هەرزەکاران هەیە کە بە ئۆتۆمبێلی چەند ملیار دۆلارییەوە دەسوڕێنەوە، لە لایەک دایک و باوک هەن کە منداڵەکانیان واز لە چوونە قوتابخانە دێنن و لە چوارڕێیانەکاندا زبڵ و خاشاک هەڵدەگرن بۆ کاری شەقام.

 

بەم شێوەیە ژنان هەژارترین بەش لە کۆمەڵگا پێکدەهێنن، وەک چۆن تەنانەت میدیا و بەرپرسانی حکومەت دان بە ژنکردنی هەژاریدا دەنێن.