ڕۆنیدا حاجی
حەسەکە- کلارا کۆبانێ، ئەندامی فەرماندەیی گشتی یەپەژە جەختی لەوە کردەوە، کە نەناسینی یەپەژە لە کاتی پڕۆسەی ئەنتیگراسیۆنی دیموکراتیکدا، نکۆڵیکردن لە ئیرادەی ژنان پێکدەهێنێت و پرۆسەی ناتەواو و کەموکوڕی بونیادنانی سووریایەکی دیموکراتیک بەردەوام دەکات.

 

لە قۆناغی نوێی ئاوەدانکردنەوەی سووریا کە دوای ڕێککەوتنی ٢٩ی کانوونی دووەمی نێوان قەسەدە و حکومەتی کاتی سووریا دەستیپێکرد، پرسی دانپێدانانی یەپەژە هێشتا چارەسەرنەکراوە.

 

لەو چوارچێوەیەدا، کلارا کۆبانێ وتی: داننان بە یەپەژە تەنها بابەتێکی سەربازی نییە، بەڵکو پرسی دیموکراتیک و شوناس و ئیرادەی ژنانە، هەروەها یەپەژە تەنها بەشێک نییە لە قەسەدە، هێزێکە کە ناسنامەی سەربەخۆی خۆی هەیە.

 

ڕوونیشیکردەوە، ڕێککەوتنی ٢٩ی کانوونی دووەم دەرگای قۆناغێکی نوێی ئەنتیگراسیۆنی کردەوە، بەڵام پرسی دانپێدانانی یەپەژە لەناو وەزارەتی بەرگریدا تا ئێستا چارەسەرنەکراون، وتی: قەسەدە لە چەندین پێکهاتە پێکدێن، یەپەژەش یەکێکە لەو هێزە سەرەکییانەی کە بەهۆی دەنگ و ناسنامە و کارەکتەری سەربەخۆی خۆیەوە پێگەی خۆی لەناو پێکهاتەی سەربازی ڕۆژئاوای کوردستان پاراستووە.

 

ئەزموونێک کە سنوورەکانی تێپەڕاند

کلارا کۆبانێ ئاماژەی بەوەدا، کە خەباتی یەپەژە تەنها لە ڕۆژئاوای کوردستاندا سنووردار نەبووە، بەڵکو بۆ چەند شارێکی سووریا درێژ بووەتەوە، هەروەها بە پەلە بە هانای ژنانی شنگالەوە ڕۆیشتن و لەگەڵیاندا شەڕیان کرد، وتی: یەپەژە ڕۆڵی سەرەکی بینی لە شەڕی داعش، ژنانیش سەرکردایەتی زۆر ئۆپەراسیۆنی سەربازییان کرد، لەنێویاندا شەڕی ڕزگارکردنی ڕەققە.

 

هۆشیاری جیهانی

تیشکی خستە سەر گرنگی ئەو هەڵمەتەی کە لە لایەن پلاتفۆرمی بۆنە هاوبەشەکانی ڕێکخراو و بزووتنەوەکانی ژنانەوە لە ٢٦ی نیسان بۆ پشتیوانی یەپەژە دەستیپێکرد، وتی: ئەم هەڵمەتە تەنها دەستپێشخەرییەک نەبوو بۆ پشتیوانیکردن لە هێزێکی سەربازی، بەڵکو دەربڕینێک بوو بۆ هۆشیاری ئەو ژنانەی کە یەپەژە وەک بەرجەستەکردنی ئیرادە و بوونیان سەیر دەکەن، ئەم هەنگاوە یارمەتیدەر بوو بۆ بەرزکردنەوەی هۆشیاری ژنان لە سەرانسەری جیهاندا و پەیوەندییەکانی نێوان خەباتی ژنان بۆ ئازادی و بەرگریکردن لە خۆپاراستنیان بەهێزتر کرد.

 

نکۆڵیکردن لە ئیرادەی ژنان

جەختی لەوە کردەوە، کە دانپێدانانی یەپەژە لەناو سوپای سووریادا تەنها بابەتێکی ڕێکخراوەیی نییە، بەڵکو دانپێدانانە بە دامودەزگاکانی ڕۆژئاوای کوردستان و ئیرادەی ژنانی کورد، وتی: دانپێدانەنان بە یەپەژە بە واتای هێشتنەوەی پڕۆسەی ئەنتیگراسیۆنی دیموکراتیکە بە ناتەواوی.

 

لە کۆتاییدا، کلارا کۆبانێ وتی: یەپەژە تەنها بۆ بەشداریکردن لە شەڕی شەڕڤانی دروست نەبوون، بەڵکو بۆ گۆڕینی بیرکردنەوەی کۆمەڵگە و شکاندنی بیرکردنەوەی پیاوسالاری دروستکراون، بۆیە داننان بە ڕۆڵی ژنان لە دەستوور و پەرلەمان و دامەزراوە کۆمەڵایەتییەکان ڕێگە خۆش دەکات بۆ گۆڕانکاری ڕاستەقینە، یەپەژە لە هەموو هەلومەرجێکدا بەردەوام دەبن لە خەباتیان بۆ پاراستنی مافەکانیان و بوونیان و میراسەکانیان.