ڕێکخراوی لێبووردنی نێودەوڵەتی لە پێگەی فەرمی خۆی لە تۆڕی کۆمەڵایەتی ئێکس سەبارەت بە بارودۆخی ژنانی ئەفغانستان لە ساڵی ٢٠٢٤دا ڕاگەیەندراوێکی بڵاوکردەوەو تێیدا هاتووە: ساڵی ڕابردوو ساڵیکی زۆر سەخت بوو بۆ مافەکانی مرۆڤ و چالاکوانانی مافی ژنان بە تایبەتی، چونکە لەلایەن تاڵیبانەوە هەڕەشەی جدی بۆ سەر مافە بنچینەییەکان و دادپەروەری و مافەکانی ژنان درووستبووە.

 

ئاماژە بەوەشکراوە، هەوڵەکانی چالاکوانانی مافەکانی ژنان نەک تەنها بۆ پاراستنی مافەکانی مرۆڤ، بەڵکو بۆ بەدەستهێنانی گەشەپێدانی بەردەوام و دادپەروەرانە و گشتگیریش گرنگە.

 

جەختیان لەوەش کردووەتەوە، لەم ساڵانەی دواییدا پاشەکشە کردن لە مافەکانی مرۆڤ و هێرشکردنە سەر داکۆکیکاران لە سەرانسەری جیهاندا زیادیکردووە و ڕێککەوتنەکانی دادپەروەری و مافەکانی مرۆڤ لەم ساڵانەدا زیاتر لە هەموو کاتێک کەوتوونەتە ژێر پرسیارەوە.

 

 داوا لە حکوومەتی وڵاتان دەکەن لە ئەمساڵەوە پابەند بن بە بەڵێنەکانیان و ڕۆڵی سەرەکی داکۆکیکارانی مافەکانی مرۆڤ لە شەڕی دژی نادادپەروەری فەرامۆش نەکەن و شوێنێکی ئارامیان بۆ دابین بکەن.