کۆبانی

 

تێکۆشەر بێرێتان هێڤی لە ٢٥ی تشرینی یەکەمی ساڵی ١٩٩٢دا، لە گڕێ لێلیکان، لە ناوچەی سێدەکان لە باشووری کوردستان، لە بەرامبەر هێرشەکانی پێشمەرگە و تورکیا کە تەسلیمبوونیان بەسەردا رەت دەکردەوە، دوای ئەوەی چەکەکەی شکاند، خۆی لە سەر زینەکانەوە فڕێ دایە خوارەوە.

 

کۆنگرەی ستاری شاری کۆبانی، بە دروشمی «تێکۆشان لەسەر هێڵی بێرێتان، تێکۆشانە لە دژی خیانەت»، لە هۆڵی ناوەندی پارتی یەکێتی دیموکراتیک (PYD) ڕێوڕەسمێکی گەورەی بیرهێنانەوەی ڕێکخست. لە ڕێوڕەسمەکەدا سەدان کەس لە دانیشتوانی کۆبانی و نوێنەرانی دامەزراوە و ڕێکخراوەکانی شار بەشدار بوون.

 

ڕێوڕەسمەکە بە خولەکێک بێدەنگی بۆ ڕێزگرتن دەستی پێکرد، پاشان زۆزان گوڵ، ئەندامی کۆنگرای ستار، وتارێکی پێشکەش کرد.

 

زۆزان گوڵ وتی: «هێڵی شەهید بێرێتان نوێنەرایەتیی قوربانیدان، قارەمانێتی، دڵسۆزی، ئازادی و یاخیبوون دەکات. بۆیەش ئەو هەڵوێستەی شەهید بێرێتان کە دەیوت: “من ڕۆمانی ڕێبەر ئەپو دەنووسمەوە”، وەک ئەفسانەیەک لە مێژووی گەل و ژنانی کورددا جێگەی گرتووە. ئێمەش وەک ژن، ئەو میراتەی کە ئەمڕۆ تێیدا دەژین و تێکۆشانەکەمان لەسەری گەشە پێدەدەین، پشت بە شەهید بێرێتان دەبەستین. بۆیە، وەک گەلی کۆبانی، لەم بیرهێنانەوەیەدا بەڵێنەکەمان نوێ دەکەینەوە. هەروەک لە زۆر قۆناغدا پێشەنگایەتیی یەکەم هەنگاومان کردووە، لەسەر هێڵی شەهید بێرێتانیش پێشەنگایەتیی گۆڕانکاری و گۆڕانگێڕی دەکەین».

 

پاشان، بە داگیرساندنی مۆم لە دەوری وێنەکانی تێکۆشەر بێرێتان، فیلمێکی دۆکیۆمێنتاری دەربارەی بوون بە سوپای ژنانی کورد، کە دوای شەهیدبوونی گوڵناز کاراتاش ڕاگەیەنرا، پیشان درا.

 

ڕێوڕەسمی بیرهێنانەوەکە بە دابەشکردنی حەڵاوە، کە یەکێکە لە نەریتەکانی ژنان، کۆتایی پێهات.

 

 

حەسەکە

 

کۆنگرەی ستاری شاری حەسەکە، بە کۆبوونەوەیەکی فراوان، ٣٤ەمین ساڵیادی شەهیدبوونی شەهید بێرێتانی لە ئەکادیمیای شەهید بێرێتان یاد کردەوە. لە کۆبوونەوەکەدا جەخت لەوە کرایەوە کە بێرێتان لە مێژووی تێکۆشانی ژنانی کورددا بووەتە هێمای ویستی ئازادیی ژنان.

 

کۆبوونەوەکە بە خولەکێک بێدەنگی بۆ ڕێزگرتن لە گیانبەختکردووان دەستی پێکرد. دوای خولەکە بێدەنگییەکە، ناهید سلێمان، نوێنەری کۆنگرەی ستاری حەسەکە، وتاری پێشکەش کرد و ئاماژەی بەوە کرد کە ویستی ئازادیی ژنان، کە لە بیر و فەلسەفەی ڕێبەر عەبدوڵا ئۆجالانەوە هێز وەردەگرێت، دەتوانێت لە بەرامبەر هەموو بەربەست و سەختییەکانی بوارە جیاوازەکانی ژیاندا خۆڕاگری بکات.

 

بێرێتان بووە هێمای ویستی ئازادیی ژنان

ناهید سلێمان بەم شێوەیە باسی شەهید بێرێتان کرد: «شەهید بێرێتان، بە ناوی ڕاستەقینەی خۆی گوڵناز کاراتاش، لە ناو بزووتنەوەی ئازادیی کوردستاندا بە ناوی بێرێتان ناسرا. لە مێژووی تێکۆشانی ژنانی کورددا وەک هێمای ئازایەتی، قوربانیدان و بەرخۆدان یاد دەکرێتەوە. لە ٢٥ی تشرینی یەکەمی ساڵی ١٩٩٢دا، لە ناوچەی خەکورکێی باشووری کوردستان، لە کاتی گەمارۆی سەربازانی تورک و پێشمەرگەدا، دوای شکاندنی چەکەکەی، خۆی لە سەر زینەکانەوە فڕێ دایە خوارەوە».

 

ناهید سلێمان ئاماژەی بەوەش کرد کە هەڵوێستی شەهید  بێرێتانلە مێژووی تێکۆشانی ژنانی کورددا بووەتە هێمایەکی گرنگ و بێرێتان هێڵی ویستی ئازادیی ژنانی کوردی بەردەوام کردووە؛ ئەو هێڵەی کە ژنان لە مێژوودا تا ئێستاش لە بەرامبەر تەسلیمبووندا ڕاوەستاون.

 

دوای وتارەکە، فیلمێکی دۆکیۆمێنتاری دەربارەی ژیانی شەهید بێرێتان پیشان درا و کۆبوونەوەکە بە دابەشکردنی شیرینی کۆتایی پێهات.