دەلال ڕەمەزان

 

حەسەکە-لەگەڵ دەستپێکردنی وەرزی زستاندا، بڵاوبوونەوەی پەتاو نەخۆشییەکان دەستپێدەکەن لەنێو ئەو ئاوارانەی کە لە کامپەکانی پەنابەراندا دەژین، بەتایبەتی منداڵان، چونکە لە چادرێکدا دەژین کە لە پلاستیک دروستکراوە و ناتوانێت بیانپارێزێت لە ساردی زستان یان گەرمی هاوین.

 

لەگەڵ کردنەوەی کامپی واشکانی، کە ١٢ کیلۆمەتر لە شاری حەسەکەوە دوورە لە باکوور و ڕۆژهەڵاتی سووریا، دوای داگیرکردنی سەرێکانی لەلایەن تورکیا و بەکرێگیراوەکانی لە ٩ی تشرینی یەکەمی ٢٠١٩، مانگی سووری کوردی، کە تاکە خاڵی پزیشکی کامپەکەیە، بۆ ماوەی چوار ساڵە کاردەکات بۆ دابینکردنی یارمەتی پزیشکی بۆ ئاوارەکان.

 

مانگی سووری کوردی گرنگی بە هۆشیاری و لایەنی دەروونیش دەدات

خوناف ئەحمەد، سەرۆکی تیمی مانگی سووری کوردی لە کامپی واشۆکانی وتی: مانگی سووری کوردی لە کامپی واشکانی کاردەکات بۆ دابینکردنی هاوکاری بۆ ئاوارەکان و دەستپێکردن بە دابینکردنی شوێنی نیشتەجێبوون جگە لە دابینکردنی پێداویستییە سەرەتاییەکان.

 

ئاماژەی بەوەشکرد، لە وەرزی زستاندا بەهۆی مەترسی بڵاوبوونەوەی نەخۆشییەکان چاودێری تەندروستی بۆ ئاوارەکان دابین دەکەن، مانگی سوور چەندین بەشی پزیشکی لە کامپەکە و کلینیکەکان کردووەتەوە کە تایبەتن بە ژنان و منداڵان، جگە لە تاقیگەیەک بۆ ئەنجامدانی پشکینین، سەنتەری مانگی سوور بەشێکی هەیە بۆ پشتیوانی دەروونی و یەکێکی دیکە بۆ پەروەردەی تەندروستی بۆ پەروەردەکردنی دایک و باوکان لەسەر چۆنیەتی پاراستنی خۆیان و منداڵەکانیان لە پەتا و گرنگیدان بە پاکوخاوێنی کەسی.

 

سەبارەت بە نەخۆشییە وەرزییەکان، خوناف ئەحمەد ڕوونیکردەوە کە بۆ هەر چوار وەرزەکە، هەندێک نەخۆشی هەیە کە لەناو دایک و باوکاندا بڵاو دەبێتەوە، بەتایبەتی کاریگەری لەسەر منداڵان دەکات، لەو نەخۆشییانەی کە لە زستاندا لەنێو خەڵکی کامپەکەدا بڵاوبوونەتەوە، هەڵامەت، هەوکردنی کۆئەندامی هەناسەدان و سکچوون، زۆرترین بڵاوە لەنێو منداڵاندا، جگە لە کەم خوێنی و بەدخۆراکی، سەرەڕای بڵاوبوونەوەی بەربڵاوی پەتای کۆرۆنا لە هەرێمەکەدا، کامپەکە زاڵ بووە بەسەر گرفتی تەندروستیدا بەهۆی هۆشیاری تەندروستی خەڵکەوە، لەم دواییانەدا، نەخۆشیی لەناو ئاوارەکاندا بڵاو بووەتەوە، ئەو نەخۆشییەی کە دەبێتە هۆی خورانی پێست، بە دابینکردنی دەرمانی پێویست کاردەکەین بۆ ڕێگەگرتن لە بڵاوبوونەوەی ئەم نەخۆشییە گوازراوە لەنێو خەڵک.

 

ئاماژەی بەوەدا لە کامپەکەدا ڕووبەڕووی کێشە دەبنەوە لە دابینکردنی دەرمانی پزیشکی، بەتایبەتی ئەوانەی کە نەخۆشییە درێژخایەنەکانی وەک هەوکردنی جومگەیان هەیە، خۆشبەختانە دەتواندرێت بە ئاسانی چارەسەر بکرێت، بەڵام لەوانەیە ئازارەکە بە تەواوی نەوەستێت بۆ چەند هەفتەیەک دوای چارەسەرکردن.

"ژنان بەهۆی ئاوی پیسەوە تووشی هەوکردن بوون"

خوناف ئەحمەد ئاماژەی بەوەشکرد، ئاوی پیس بووەتە هۆی هەوکردنی توند لە ژناندا جگە لە بەردی گورچیلە، خراپبوونی بارودۆخی ژیان لە کامپەکەدا ڕێگە بە دانیشتوان نادات ئاوی کانزایی بێ کلۆر بکڕن.

 

ئەمیرە حەمید، ژنێکی ئاوارەی خەڵکی سەرێکانی کە بۆ ماوەی چوار ساڵ لە کامپی واشکانی ژیاوە، وتی: مانگی سووری کوردی چەندین جۆری دەرمان و خزمەتگوزاری پزیشکییان بۆ دابین کردوین، بەهۆی پیسبوونی ئاوەوە، زۆرێک لە نەخۆشییەکان بڵاوبوونەتەوە، بەتایبەتی لە زستاندا، دەمانەوێت بە زووترین کات شارەکەم ئازاد بکەن و بگەڕێینەوە بۆی و لە ئاسایش و ئاشتییدا بژین.