تەوار پێنجوێنی

 

بەیروت- کۆنفرانسی هەرێمیی ژنانی ڕۆژهەڵاتی ناوەڕاست و باکووری ئەفریقا، بە دروشمی "بە دروشمی ژن، ژیان، ئازادی، ئەزموونی بزووتنەوەکانی ژنان بۆ ڕزگاربوون لە قەیرانە هەرێمییەکان" لە ڕۆژانی -١٩ی ئاب بە بەشداری ژنانی ١١ وڵات لە بەیروتی پایتەختی لوبنان بەڕێوەچوو.

 

کۆنفرانسە لەسەر بنەمای بانگەوازی هەڵمەتی کۆمەڵگەی ژنانی کوردستان-کەژەکە بوو، کە لە ٣-١٥ی ئاب دەستیپێکرد و ئامانج لێی پشتیوانیکردنی ژنانی ئێزیدی و ئەفغانستان بوو.

 

بوشرا عەلی، سەرۆکی ڕێکخراوی ژین‌ی ژنان لە لوبنان و ئەندامی دەستەی ئامادەکاری كۆنفرانسەکە، ڕایگەیاند کە کۆنفرانسەکە لەسەر بنەمای هەڵمەتی کەژەکە بوو بۆ پشتیوانی لە ژنانی ئێزیدی و ئەفغانستان، وتی: ٣ی ئاب ساڵڕۆژی جینۆسایدی شەنگال و ١٥ی ئاب ساڵیادی جینۆسایدی ئەفغانستانە، بە هۆی گەڕانەوەی تاڵیبان بۆ سەر دەسەڵات، ئەمە جینۆسایدێکی سیاسی بوو، بۆیە وەک ڕێکخراوی ژینی ژنان و ڕێکخراوی کولتووری و هونەری نەورۆز بڕیارماندا پاڵپشتی هەڵمەتەکە بکەین و بەشێک بین لەم هەڵمەتە نێودەوڵەتییەی ژنان.

 

بوشرا عەلی باسی لەوەکرد، کۆنفرانسەکە دەنگی بەرخۆدانی ژنانی ئەفغانستان و شەنگال بوو، وتیشی: هەموومان دەزانین کاتێک لە ڕۆژئاوا جینۆسایدێک لە دژی ژنانی کورد ڕوویدا، لە شەنگالیش جینۆسایدێک لە دژی ژنانی ئێزیدی ڕوویدا، ژنانی ئەفغانی بێدەنگ نەبوون، لەگەڵ ژنانی کورد مانەوە و هەڵوێستی بەنرخ و پیرۆزیان خستەڕوو، ئێمە لە ئێستادا وەک پیرۆزبایی لە بەرخۆدانی ژنانی شەنگال و ئەفغانستان، ویستمان هەڵوێستمان هەبێت و ئەم کۆنفرانسە ئەنجام بدەین و لە یەک کاتدا پرسی ژنان، پرسی ژنانی عەرەب، پرسی ژنانی ئێران و ئەفغانستان، پرسی ژنانی کورد و ئەفریقا تاوتوێ بکەین.

 

بوشرا عەلی تیشکی خستەسەر بنەمای هزری و بەرخۆدان و ئەزموونەکانی ژنانی کورد، لەسەر فەلسەفەی ڕێبەری گەلی کورد، عەبدوڵا ئۆجالان و وتی: ئێمە ویستمان فەلسەفەی ڕێبەر عەبدوڵا ئۆجالان پێناسە بکەین، کە سەرچاوەی ئەزموونەکانی ژنانی کوردە و وەک دیارییەک پێشکەشی بەرخۆدانی ژنانی ئەفغانستان و ژنانی شەنگالی بکەین، تا بە ناساندنی ئەم فەلسەفەیە ئێمەی ژنان هەموومان بتوانین سوودی لێ ببینین و جێبەجێی بکەین بە پشتبەستن بە تایبەتمەندییەکانی هەر وڵاتێک، بە یەکڕیزی سەرکەوتن و ئازادی بەدەست بهێنین.

 

بوشرا عەلی، وەک سەرۆکی ڕێکخراوی ژین‌ی ژنان ئەندامی دەستپێشخەری "نادا"ن، کە لە ڕۆژهەڵاتی ناوەڕاست و باکووری ئەفریقا پێکهاتووە و زیاتر لە ٢٠٠ دامەزراوە و کەسایەتی لە ٢٢ وڵاتی جیهان لەخۆدەگرێت، ڕایگەیاند، ئێمە وەک دەستپێشخەری نادا لە هەمان کاتدا لەگەڵ ڕاگەیاندنی هەڵمەتەکەی کەژەکە بەیاننامەیەکمان بڵاوکردەوە و ڕامانگەیاند، کە ئێمەش لەگەڵ ژنانی ئەفغانستان و شەنگالین و دەستخۆشییان لێدەکەین بۆ خۆڕاگرییان و ئامادەین هەرچی داوامان لێبکرێت، بیکەین و بەشداری بکەین لەم هەڵمەتەدا.

 

بوشرا عەلی جەختی کردەوە، بەستنی کۆنفرانسێکی لەو شێوەیە وەڵامێکی ڕوون و ئاشکرایە بۆ پشتیوانی لە ژنانی شەنگال و ئەفغانستان، هەروەها خاوەنداریکردنە لە هزر و فەلسەفەی ڕێبەر ئۆجالان کە تێزەکانی تایبەتن بە ژنان و پێداگیرمان بۆ پشتیوانی لە ڕێبەر ئاپۆ دووبارە کردەوە.

 

لە کۆتایی قسەکانیدا بوشرا عەلی جەختی لەوە کردەوە: ئێمەی ژنان، چ لە ڕۆژئاوا، باکوور، باشوور، شەنگال، ئەفغانستان، یان ڕۆژهەڵات، پشتیوانی فەلسەفەی ڕێبەر ئاپۆ دەکەین و لەسەر ئەو بنەمایە هێز وەردەگرین و ڕێکخستن دەکەین.