ناوەندی هەواڵ

 

کاتێک لە ساڵی ٢٠١٤ داعش هێرشیکردە سەر زۆرینەی شارەکانی عێراق، خەڵکی ئەو ناوچانە ناچاربوون کۆچ بکەن و ئاوارەی ناوخۆو دەرەوەی حێراق ببن، دوای چەندین ساڵ لە ڕزگارکردنی ناوچەکانیان لەدەستی داعش تا ئێستاش زۆرینەیان نەیانتوانیووە بچنەوە ناوچەکانی خۆیان، هەرچەندە لەماوەی ئەم چەند مانگەی دواییدا هەندێک کاروانی گەڕانەوە هەبوو بەڵام دەبێت کار بۆ گەڕانەوەی تەواوی ئاوارەکان بکرێت و ناوچەکانیان ئاوەدان بکرێتەوە.

 

لەسەر ئەو پرسە، لیژنەی كۆچ و كۆچبەران لە ئەنجومەنی نوێنەرانی عێراق ڕاگەیەندراوێکی بڵاوکردەوە و تێیدا هاتووە: دەزگاكانی حكومەت هەنگاوی جددییان نەناوە بۆ گەڕانەوەی ئاوارەكانی كامپەكان بۆ ناوچەی ڕەسەنەكانییان لە بەغدا، موسڵ و بەتایبەتی شنگال، دۆسیەكە بووەتە كارتێكی مرۆیی و سیاسی لە نێو ستراتیژییە نێودەوڵەتییەكان، پێویستی بە دەستێوەردانی دەستبەجێی حكومەت هەیە، بۆ چارەسەركردنی كێشەی گەڕانەوەی ئاوارەكان.

 

نزیکەی یەک ملیۆن ئاوارەی شنگال و کەرکوک هەن

ئاماژە بەوەشکراوە، ژمارەی ئاوارەكانی شنگال زیاتر لە ٣٠٠ هەزار كەسە، هاوكات كۆی گشتیی ئاوارەكانی شنگال و ناوچەكانی كەركوك لەنێوان ٨٠٠ هەزار بۆ یەك ملیۆن ئاوارەدایە، كە بەشێكیان لە كامپەكانی سنورەكە نیشتەجێن و لە پێكهاتەی ئێزیدیی پێكهاتوون، ئەمە لە كاتێكدایە هەندێكی تر لە دەرەوەی كامپەكان دەژین.

 

لیژنەکە ئەوەشیخستووەتەڕوو، گرفت هەیە لە گەڕانەوەی ئاوارەكانی كەركوك، چونكە هەر خێزانێك پێویستی بە بەڵگەنامەی ئەمنی هەیە بۆ ئەوەی بگەڕێتەوە، بەو پێیەی تا ئێستا ئەو ڕێكارانە نەگیراونەتەبەر، ئەمەش بارگرانی و فشاری دەروونی و ئابوری لەسەر ئاوارەكانی كەركووك زیادكردووە، ئاوارەكانیش دەیانەوێت بگەڕێنەوە بۆ ناوچەكانی خۆیان.