ناوەندی هەواڵ

 

بەڕێوەبەرایەتی پۆلیسی پارێزگای سلێمانی بڵاویکردەوە، دوای ئەوەی لەلایەن مەفرەزەكانی بەشی نەهێشتنی تاوانی سلێمانییەوە چاودێری خرایە سەر كەسێك، بە گومانی ئەوەی كە لە ڕێگەی تۆڕە کۆمەڵایەتییەکانەوە هەڕەشەی بڵاوكردنەوەی وێنە و ڤیدیۆی تایبەتی لە ژنان دەكات، پاش لێكۆڵینەوەكان و تۆماركردنی سكاڵای یاسایی لەلایەن یەکێک لە ژنەکانەوە، كە لە بەرامبەر پێدانی بڕێك پارە هەڕەشەی بڵاوکردنەوەی وێنە و ڤیدیۆی تایبەتی لێكردووە، تواندرا تۆمەتبار بدۆزرێتەوە و دەستگیر بكرێت، هەروەها دەستیش گیرا بەسەر مۆبایلی تایبەتی تۆمەتباردا.

 

ئاماژە بەوەشکراوە، لە ئێستادا تۆمەتبار "م، ع، س" لە دایكبووی ساڵی ١٩٧٤، بە بڕیاری دادوەر و بەپێی ماددەی ٢ لە یاسای خراپ بەكارهێنانی ئامێرەكانی پەیوەندیکردن ڕاگیراوە و دانی ناوە بەوەدا کە لە ژێر ناوی ئەنجامدانی هاوسەرگیری پەیوەندی لەگەڵ چەند ژنێک دروستكردووە و هەڕەشەی  لێکردوون کە ئەگەر پارە و ئاڵتونی نەدەنێ‌، وێنە و ڤیدیۆیان بڵاو دەکاتەوە.