ناوەندی هەواڵ

 

لە سودان، ململانێی نێوان سوپای سودان و هێزەکانی پشتیوانی خێرا کە ماوەی زیاتر لە ساڵێکە بەردەوامە، بووەتە هۆی دروستبوونی مەترسی برسێتی لەو وڵاتە.

 

بەرپرسانی باڵای نەتەوە یەکگرتووەکان ئەمڕۆ دووپاتیانکردەوە کە لە شاری فاشر لە سودان، بەهۆی برسێتی و زیادبوونی توندوتیژییەکان، نزیکەی ٨٠٠ هەزار کەس لە مەترسییەکی گەورەدان و دەبێت بەپەلە کارێک بکرێت.

 

ڕۆسیماری دیکارلۆ، بەرپرسی کاروباری سیاسی نەتەوە یەکگرتووەکان ڕایگەیاند، شەڕی بەردەوامی نێوان هێزەکانی پشتیوانی خێرا و سوپای سودان لە سەرتاسەری دارفور، بووەتە هۆی دروستبوونی ململانێیەکی خوێناوی لە نزیک شاری فاشر، پایتەختی دارفۆری باکوور، دیاری کرا کە ٢٥ ملیۆن کەس پێویستیان بە هاوکاری مرۆیی هەیە و نزیکەی ٨ ملیۆن کەس ئاوارە بوون.

 

هەزاران کەس ئاوارە بوون

سەرۆکی بەشی ئۆپەراسیۆن و پاراستن لە فەرمانگەی نەتەوە یەکگرتووەکان بۆ هەماهەنگی کاروباری مرۆیی ڕایگەیاند: توندوتیژییەکانی شاری فاشر کە هەڕەشە لە ٨٠٠ هەزار هاوڵاتی مەدەنی دەکات، بووەتە هۆی ئاوارەبوونی زیاتر لە ٣٦ هەزار کەس و ٩ ملیۆن کەس لە شارەکاندا دەژین و ئاگادارکراونەتەوە کە لە دارفۆر پێویستیان بە یارمەتی مرۆڤ هەیە.

 

لە کۆتایی مانگی ئاداری ڕابردوو ڕێکخراوێک کە گرنگی بە ئاسایشی خۆراک دەدات و لەلایەن نەتەوە یەکگرتووەکانەوە پاڵپشتی دەکرێت، ڕایگەیاند کە سودان لە لێواری برسێتیدایە و ڕایدەگەیەنێت کە بەمەبەستی ڕێگریکردن لە مردنی خەڵک و تێکچوونی هەموو بارودۆخەکان، بڕیاری ڕاگرتنی شەڕ لەو وڵاتە پێویستە بدرێت.