ناوەندی هەواڵ

 

ئەمڕۆ ٢٥ی تشرینی دووەم، بیرسەن ئۆرهان، هاوسەرۆکی شارەوانی شاری دێرسیمی باکووری کوردستان، کە دوابەدوای بڕیاری وەزارەتی ناوخۆی تورکیا بۆ دانانی قەیوم لێپێچینەوە و دەستگیرکرا، برایە بنکەی پۆلیس بۆ ئەوەی ڕوونکردنەوە بدات، دوای تەواوبوونی پرۆسەی لێکۆڵینەوەکە ڕەوانەی داواکاری گشتی کرا.

 

داواکاری گشتی بیرسەن ئۆرهانی، کە لەلایەن هاوڵاتیانی دێرسیمەوە بە سەرۆکی شارەوانی دێرسیم هەڵبژێردرا و لەلایەن دەوڵەتی تورکیاوە بە سەرۆککۆماری ڕەجەب تەیب ئەردۆغان لەکارەکەی دوورخرایەوە و قەیوم بۆ شارەوانی دێرسیم دەستنیشانکرا، هەروها بە تۆمەتی "هاندانی خەڵک بۆ دوژمنایەتی و ڕق" و ""سووکایەتیکردن بە بەرپرسێکی حکومی" بە دادگای تاوانەکانی ناساند و داواکارییەکی بۆ دەستگیرکردن و گواستنەوەی بۆ زیندان پێشکەش کرد.

 

دوای لێپرسینەوە لە دادگا، دادوەر بڕیاریدا بە جێبەجێکردنی ڕێوشوێنی کۆنترۆڵکردنی دادوەری بیرسەن ئۆرهان ئازاد بکات. بەم پێیە خراوەتە ژێر دەستبەسەری ماڵەوە و هەروەها لە دەرکەوتن بۆ دەرەوەی وڵات لێ قەدەغە کراوە. پێویستە ئاماژە بەوە بکرێت کە وەزارەتی ناوخۆی تورکیا دوو ڕۆژ لەمەوبەر دوای دوورخستنەوەی سەرۆک شارەوانییە هەڵبژێردراوەکانی پارتی یەکسانی و دیموکراسی گەلان، دەم پارتی لە دێرسیم و پارتی کۆماری خوازی گەل (جەهەپە) لە پولور (ئۆڤاجک) قەیومی دانا. ئەم کارە بە کاردانەوەی توندی خەڵک بەرەوڕوو بووەوە و ناڕەزایەتی شەقامەکانی نێوان خەڵک و هێزەکانی پۆلیس ڕاکێشرایە ناو ململانێیەکەوە.

 

بەگوێرەی ڕاگەیەندراوی وەزارەتی ناوخۆ، لە شارەوانی دێرسیم، لەبری جەودەت کۆناک و بیرسەن ئۆرهان، هاوسەرۆکەکانی شارەوانییەکە، بولێنت تەک بەیک ئۆغڵو بە پارێزگاری دێرسیم دەستنیشان کراون. هەروەها لە شارەوانی پولور لەبری مستەفا ساریگۆل، حسێن شامیل سۆزان، وەک پارێزگاری ئەم شارە ناسێندرا.