ناوەندی هەواڵ

 

لە ٢٥ی تەمموزدا تەڤگەری ئازادی ژنانی ئێزدی تاژێ و ژنانی عێراق بە دروشمی “بە خەباتی هاوبەشمان دەبینە دەنگی پاراستنی ژنان لە جینۆساید” سێهەمین کۆنفرانسیان ساز کرد، دوێنێ تاژێ دەرەنجام و ڕاسپاردەکانی کۆنفرانسەکەی ئاراستەی محەمەد شیاع سودانی، سەرۆک وەزیرانی عێراق کرد.

 

جێی ئاماژەیە لە کۆتایی کۆنفرانسی ژنانی عێراقدا و لە ئەنجامنامەی کۆنفرانسەکەدا، ژنان داوایان لە حکومەت کرد کە بە فەرمی فەرمانی ٣ی ئابی ٢٠١٤ وەک جینۆسایدێک لە دژی کۆمەڵگەی ئێزدی بناسێت و ئەو وڵات و ڕێکخراوە نێودەوڵەتییانەی کە بە فەرمی دانیان بە جینۆسایددا ناوە، داوایان لێکرا کە هەنگاو بنێن بۆ لێپێچینەوە داعش و هاوبەشەکانی کە بەرپرسیارن لە تاوانەکانی جینۆساید.

 

لە ئەنجامەکەدا کە بۆ سودانی نێردراوە، داوا لە حکومەتی عێراق کراوە کە هەنگاو بۆ دیاریکردنی چارەنووسی نزیکەی ٧ هەزار ئێزدی و سێ هەزار و ٥٠٤ ژن و ٨٦٩ پیاو و منداڵێکی زۆر، کە لەلایەن چەتەکانی داعشەوە ڕفێنراون و هەزاران ژن و منداڵی ئێزدی بنێت.

 

هەروەها داوا کرا کە ئاسمانی شەنگال دابخرێت و هێرشەکانی دەوڵەتی تورکیا، کە لە ساڵی ٢٠١٧ەوە ١٠٠ جار بە فڕۆکەی جەنگی و فڕۆکەی بێفڕۆکەوان تۆپبارانی شەنگالی کردووە و کۆمەڵکوژی ئەنجامداوە، ڕابگیرێت. هەروەها داوا کرا بەپێی دەستووری عێراق بە فەرمی دانپێدانانی ئیدارەی خۆبەخۆی شنگال بکرێت.

 

هاوکات لە کۆتاییدا پێشنیاری گۆڕینی یاسای باری کەسیی عێراق ڕەتکرایەوە و ڕاگەیەندرا کە ئەم گۆڕانکارییە ڕەنگە عێراق بکاتە دەوڵەتێکی تائیفی و ئایینی.