خۆبەڕێوەبەری باکوور و ڕۆژهەڵاتی سووریا ٣٢ منداڵی داعشی ڕادەستی ڕووسیا کردەوە
ماریا بیلۆڤا، کۆمیساری مافەکانی منداڵانی ڕووسیا ڕایگەیاند، خۆبەڕێوەبەری باکوور و ڕۆژهەڵاتی سووریا ٣٢ منداڵی خێزانەکانی داعشی ڕادەستی ڕووسیا کردووە.
ناوەندی هەواڵ
ماریا بیلۆڤا، کۆمیساری مافەکانی منداڵانی ڕووسیا، لە لێدوانێکیدا بۆ میدیاکانی ڕووسیا ڕایگەیاند، کە وڵاتەکەی بەشێکی دیکەی منداڵانی چەتەکانی داعشی ڕووسیی لە کەمپەکانی باکوور و ڕۆژهەڵاتی سووریا گەڕاندووەتەوە.
ماریا بیلۆڤا ڕایگەیاند، کاری گەڕاندنەوەی منداڵەکان بە هەماهەنگی خۆبەڕێوەبەری باکوور و ڕۆژهەڵاتی سووریا ئەنجامدراوە و ٣٢ منداڵ دەگەڕێندرێنەوە بۆ کەسوکاریان لە ڕووسیا.
لە ناوچەکانی باکوور و ڕۆژهەڵاتی سووریا چەندین کامپی تێدایە کە هەزاران خێزانی داعش لە ٥٢ وڵاتی بیانییەوە نیشتەجێ بوون تاییدا، خۆبەڕێوەبەری باکوور و ڕۆژهەڵاتی سووریا هەمیشە داوا لە دەوڵەتەکان دەکات هاوڵاتیانیان بگەڕێننەوە کە لەناو داعشدان و چاوپۆشی لەم حاڵەتە نەکەن، چونکە مەترسییە بۆ سەر ناوچەکە و جیهان.