سێ شار بوونەتە ناوچەی مەترسیدار لە کەرتی غەززە
دوای ئەوەی هێزەکانی ئیسرائیل ٤ کۆمەڵکوژییان لە دژی خێزانەکان لە غەززە ئەنجامدا، ژمارەی زیان لێکەوتووان بۆ ٣٦ هەزار و ٤٣٩ کەس بەرزبووەوە.
ناوەندی هەواڵ
بەهۆی شەڕی بەردەوام کە ماوەی ٢٤٠ ڕۆژە لە نێوان هێزەکانی ئیسرائیل و بزووتنەوەی حەماس هەیە، لیژنەی فریاکەوتنی شارەوانی لە باکووری کەرتی غەززە، بەهۆی ئەو وێرانکارییە بەرفراوانە، جەبەلیا، کەمپەکەی، بەیت لاحیا و بەیت حەنون بە ناوچەی مەترسیدار ناساند.
ئەمڕۆ، وەزارەتی تەندروستی لە غەززە ڕایگەیاند، ژمارەی گیان لەدەستدان لە کەرتی غەززە بۆ ٣٦ هەزار و ٤٣٩ کەس بەرزبووەتەوە و لە حەوتەمی تشرینی یەکەمی ڕابردووەوە ٨٢ هەزار و ٦٢٧ کەسیش برینداربوون.
بەپێی بەیاننامەی وەزارەتەکە، هێزەکانی ئیسرائیل لە ماوەی ٢٤ کاتژمێری ڕابردوودا ٤ کۆمەڵکوژییان لە دژی خێزانەکان ئەنجامداوە، کە ٦٠ کەسیان گیانیان لەدەستداوە و ٢٢٠ کەسیش برینداربوون.
سەرەڕای نیازی دادگای تاوانە نێودەوڵەتییەکان بۆ دەرکردنی فەرمانی دەستگیرکردنی نێودەوڵەتی دژی بنیامین ناتانیاهۆ سەرۆک وەزیران و یۆئاڤ گالانت وەزیری بەرگری وڵاتەکەیان بەهۆی بەرپرسیارێتییان لە تاوانەکانی جەنگ و تاوانەکانی دژی مرۆڤایەتی، هێزەکانی ئیسرائیل بەردەوامن لە هەڵمەتەکانیان بۆ سەر غەززە.
هەروەها ئیسرائیل بڕیارنامەیەکی ئەنجومەنی ئاسایشی نەتەوە یەکگرتووەکان بۆ ئاگربەستی دەستبەجێ پشتگوێ دەخات، هەروەها فەرمانی دادگای نێودەوڵەتی بۆ گرتنەبەری ڕێوشوێنی دەستبەجێ بۆ ڕێگریکردن لە کردەوەی جینۆساید و باشترکردنی دۆخی مرۆیی غەززە و ڕاگرتنی ئۆپەراسیۆنە سەربازییەکان لە ڕەفەح لابردن.