ناوەندی هەواڵ

 

دەسەڵاتدارانی ئێران بەردەوامن لە دەستبەسەرکردنی ژنە چالاکوانە مەدەنییەکان بەبێ ئاشکراکردنی شوێن و باری یاساییان، ئەمەش لە کاتێکدایە کە ڕەخنەکانی مافی مرۆڤ سەبارەت بە نەبوونی زانیاری فەرمی و سەختی چاودێریکردنی بارودۆخی تەندروستی و یاسایی دەستبەسەرکراوان پەرەدەسێنێت.

 

ڕاپۆرتە خۆجێییەکان ئاماژە بەوە دەکەن، کە گوزەل نەجەفی، چالاکوانی مەدەنی تەمەن ٥٠ ساڵ، ڕۆژی ٢٣ی ئاب لە شاری ئازردشهر دەستبەسەر و پاشان بەبێ هیچ ڕاگەیاندنێکی فەرمی لە شوێنی دەستبەسەرکردنی و چۆنیەتی ئەو تۆمەتانەی کە ئاراستەی کراوە، بۆ تەورێز گوازراوەتەوە.

 

لە ماوەی ساڵانی ڕابردوودا، گوزەل نەجەفی لە ڕێگەی بڵاوکردنەوەی چالاکانەی بابەتەکانی تایبەت بە پرسەکانی زمان و کولتووری ئازەربایجان، مافی خوێندن بە زمانی دایکی، هەروەها بابەتەکانی ژینگەیی، لەوانەش بارودۆخی گۆلی ورمێ، خۆی جیاکردەوە.

 

لەگەڵ بەردەوامی دەستبەسەرکردنی و نەبوونی زانیاری لەسەر تەندروستی، نیگەرانییەکان سەبارەت بە بارودۆخەکەی چڕتر بووەتەوە، سەرچاوە میدیاییەکان باس لەوە دەکەن، کە ئەو ژنە پێویستی بە چاودێری پزیشکی هەیە، بەڵام تا ئێستا دەسەڵاتداران هیچ ڕوونکردنەوە و پشتڕاستکردنەوەی ئەو زانیارییانەیان دەرنەکردووە.

 

دوای زیاتر لە سێ هەفتە لە دەستگیرکردنی، وردەکارییەکانی سەبارەت بە دۆخی یاسایی یان شوێنی دەستبەسەرکردنی لەبەردەستدا نییە، ئەمەش نیگەرانییەکانی لەبارەی بارودۆخی دەستبەسەرکردنی و دەستڕاگەیشتن بە چاودێری پزیشکی و مافە یاساییەکانی دروستکردووە، هەروەها نەبوونی زانیاری لەسەر دەستبەسەرکراوان، بەتایبەتی کاتێک شوێنی نیشتەجێبوونیان یان باری یاساییان بۆ خێزانەکانیان ناڕوونە، ئەمەش چاودێریکردنی دۆخی تەندروستی و یاساییان ئاڵۆزتر دەکات، لە دۆسیەی گوزەل نەجەفیدا، ئاشکرانەکردنی ئەو تۆمەتانە یان ئەو ڕێکارانەی کە لە دژی گیراونەتەبەر، نیگەرانییەکان سەبارەت بە دۆخی ئێستای قوڵتر دەکاتەوە.