ناوەندی هەواڵ

 

سەیران خوسرەوی، یەکێک لە چالاکوانانی مافی ژنان لە شاری سنە، نزیکەی مانگێک لەمەوبەر لەلایەن هێزە ئەمنییەکانی ئەو شارەوە دەستبەسەر کرا و تا ئێستاش هیچ زانیارییەک لەسەر بارودۆخی ناوبراو، لەبەردەستدا نییە.

 

سەیران خوسرەوی ڕۆژی ١٩ تشرینی دووەم، لە سەروبەندی ڕۆژی جیهانی بەرەنگاربوونەوەی توندوتیژی دژی ژنان، لە هێرشێکدا بۆ سەر ماڵەکەی دەستبەسەرکرا و تا ئێستا مافی پارێزەر و پەیوەندیکردن بە بنەماڵەکەیەوە پێنەدراوە دەستبەسەرە.

 

تا ئێستا هیچ هەواڵێک سەبارەت بە ئەگەری تۆمەتەکانی دژ بە ناوبراو بڵاو نەکراوەتەوە و سەرەڕای بەدواداچوونی بنەماڵەکەی، هیچ زانیارییەک لەبارەی بارودۆخییەوە دەست نەکەوتووە.

 

نەزانینی شوێنی دەستبەسەری ئەم چالاکوانە نیگەرانی لە بارودۆخی تەندروستی و هەروەها دەرئەنجامە ئەگەرییەکانی بەرامبەری زیاتر دەکات.

 

دەستبەسەر کردنی ئارەزوومەندانە بەبێ خستنەڕووی هۆکار و بەڵگەی چالاکوانان لە بوارە جیاجیاکان و کردەوە باوەکانی ڕژێمی  ئیسلامی ئێران بەردەوامە، هەر لە سەرەتای ڕاپەڕینی شۆڕشگێڕانەی "ژن، ژیان، ئازادی"ەوە، زۆرێک لە چالاکوانانی مافی ژنان لە ڕۆژهەڵاتی کوردستان و ئێران دەستگیرکران و ئەشکەنجە دراون و ڕووبەڕووی هەڕەشە بوونەتەوە.