هەڵەبجە

 

پاش ئەوەی وەزارەتی پەروەردەی حکومەتی ماوە بەسەرچووی هەرێمی کوردستان لە نوسراوێکدا ڕایگەیاند، پاش گفتوگۆکردن لەگەڵ ئەنجومەنی وەزیران، رەزامەندی هەیە پاش هەموارکردنەوەی یاسای بودجەی فیدڕاڵی و ناردنی شایستە داراییەکانی هەرێم، پلەبەرزکردنەوە دەستپێبکاتەوە و مامۆستایانی وانەبێژی دانەمەزراویش بەگوێرەی رێنماییەکانی وەزارەتی دارایی دەکرێن بەگرێبەست.

 

ئەم نووسراوەی وەزارەتی پەروەردە بە ئامانجی گەڕانەوەی مامۆستایان بوو بۆ هۆڵەکانی خوێندن و ناڕەزایەتی مامۆستا و فەرمانبەرانی ناڕازی لێکەوتەوە، دوێنێ لە کۆنگرەیەکی ڕۆژنامەنووسیدا، ئەنجومەنی مامۆستا و فەرمانبەرانی ناڕازی دووپاتیان کردەوە کە بەردەوام دەبن لە بایکۆت، چونکە چەندین جاری دیکە بەڵێنیان پێدراوە و جێبەجێ نەکراوە.

 

لەو چوارچێوەیەدا پێشنیوەڕۆی ئەمڕۆ لە سلێمانی، گەرمیان، ڕاپەرین و هەڵەبجە خۆپیشاندانی سەرتاسەری مامۆستایان بەڕێوەچوو.

 

لە شاری هەڵەبجە مامۆستایانی ناڕازی گردبوونەوە و بە دروشمەکانیان داوای مافە سەرەتاییەکانی خۆیانیان کرد و ڕایانگەیاند، تا جێبەجێ کردنی داواکارییەکانیان بەردەوام دەبن لە بایکۆت.

 

وەسنا محەمەدخان، مامۆستایەکی ناڕازییە و وتی: ٢٥ ساڵە مامۆستام و هاتنی ئەمڕۆم بە مەبەستی نوێ کردنەوەی وەرزی دووەمی خۆپیشاندانەکانە، پێویستە بە جدی لە چوارچێوەی بودجەدا کار لەسەر شایستە داراییەکان بکەن و هیواخوازین دووبارە بە خۆیاندا بچنەوە.

 

مامۆستا وەسنا باس لەوەش دەکات، جگە لە حکومەت سەرپەرشتیاری یەکەمی پەروەردەی سلێمانی سوکایەتی بە مامۆستایان کردووە و پیویستە لێپێچینەوەی بەرامبەر بکرێت، چیتر تەنها ناکرێت قسە بکرێت، دەبێت بە کردار بیسەلمێنن.

 

ژیوار عومەر، مامۆستایەکی وانەبێژە و باس لەوە دەکات، چەندین ساڵە بەردەوامین لە خۆپیشاندان و دەمانەوێت بکرێین بە گرێبەست و دابمەزرێین، بەڵام لەبەرئەوەی ساڵانی پیشوو پەیمانیان پێداوین کە دەکرێین بە گرێبەست و جێبەجێش نەکرا، لە ئێستادا باوەڕمان بە نووسراو نییە، بەڵکو دەبێت جێبەجێ بکرێت، ئینجا باوەڕ دەکەین.