ناوەندی هەواڵ

 

ئەنتۆنیۆ گۆتێرێس، سکرتێری گشتیی نەتەوە یەکگرتووەکان لەبارەی پێشێلکارییەکانی مافی مرۆڤ لە ئێران و ڕۆژهەڵاتی كوردستان ڕاپۆرتێکی بڵاوکردەوە.

 

ئەنتۆنیۆ گۆتێرێس ڕایگەیاند، داوا لە ئێران دەکەین دەستبەجێ سزای لەسێدارەدان ڕابگرێت و زیندانیانی سیاسی و ئەو کەسانەی بە هەڕەمەکی دەستگیر کراون ئازاد بکات و کۆتایی بە ئەشکەنجەدان بهێنێت، هەروەها داوای هەڵوەشاندنەوەی یاسای جیاکاری دژی ژنان و لابردنی باڵاپۆشی زۆرەملێ دەکەین.

 

ئاماژەی بەوەشکرد، دەستگیرکردن و جیاکاری دژی بەهاییەکان، کوردەکان، بەلووچ و عەرەبەکان لە دوای شەڕی ١٢رۆژی نێوان ئێران و ئیسرائیل چڕتر بووەتەوە، ئەشکەنجەدانی زیندانیان و بە تایبەت زیندانیانی سیاسیی جێی نیگەرانیە، دەرچوونی سزای بڕینەوەی ئەندامانی جەستە و لێدانی قامچی پێشێلکردنی ئاشکرای مافەکانی مرۆڤە.

 

ئەنتۆنیۆ گۆتێرێس، سکرتێری گشتیی نەتەوە یەکگرتووەکان باسی لەوەشکرد، ڕێنماییەکانی ئەم دواییەی سەرۆکی دادوەری ئێران بۆ خێراکردنی مامەڵەکردن لەگەڵ کەیسەکانی سیخوڕی، دەستگیرکردنی هەڕەمەکی، دادگایی نادادپەروەرانە و لەسێدارەدانی زیاد کردووە، لەگەڵ ئەوەشدا، پرۆژە یاسای توندکردنی سزاکان بە تۆمەتی”سیخوڕیکردن” هەڕەشەیەکی جددییە بۆ سەر ئازادی ڕادەربڕین و دەستگەیشتن بە ئینتەرنێت.

 

ئەوەش لە کاتێکدایە، بە پێی ئاماری ڕێکخراوی مافی مرۆڤی هانا لە ساڵی ڕابردوودا لە ڕۆژهەڵاتی کوردستان و ئێران زیاتر لە هەزار و ٥٣٧ کەس لەسێدارە دراون، هەروەها بە پێی ڕاگەیاندراوی هەڵمەتی”سیشەممەکانی نا بۆ لەسێدارەدان” لە سەرەتای ئەمساڵەوە تا ئێستا هەزار و ٨٧ کەس لە ڕۆژهەڵاتی کوردستان و ئێران لەسێدارە دراون.