"بڕینی ئاو گەورەترین جۆری توندوتیژییە"
ئەندامانی یەکێتی جوتیاران لە حەسەکە دووپاتی دەکەنەوە کە بڕینی ئاوی ڕووباری خابور توندوتیژییە بەرامبەر بە ژنان و سروشت و زەوی و ڕایانگەیاند کە ژنان پەیوەستن بە زەوی و کشتوکاڵەوە چونکە بە بەشێکی گرنگی ژیانی خۆیان دەیبینن.
رۆنیدا حاجی
حەسەکە- لە سەرەتای قەیرانی سووریاوە، دەوڵەتی تورکیا ئاوی ڕووباری خابوری بڕیوە و ئاوی ڕووباری فوراتی کەمکردووەتەوە. ئەمەش کاریگەری نەرێنی لەسەر ژنە جووتیارەکان و زەوی و سروشت هەیە، ئەندامانی یەکێتی جوتیاران بۆچوون و نیگەرانییەکانی خۆیان لەسەر ئەو پرسە بۆ دەزگاکەمان باسکرد.
"ژنان خۆیان وەک بەشێک لە کشتوکاڵ و زەوی دەبینن"
نەدا حیلۆ، ئەندامی یەکێتی جوتیاران لە شەداد، پشتڕاستی کردەوە کە ناوچەی جزیرە زۆر پشت بە کشتوکاڵ دەبەستێت و ئەوانەی پەرە بەم کارە کشتوکاڵییە دەدەن ژنانن، ژنان خۆیان وەک بەشێک لە زەوییەکە دەبینن، هەر بۆیەش کاردەکەن لە پەرەپێدانی کشتوکاڵدا، بەهۆی بارودۆخی ئێستا و بڕینی ڕووباری خابور لەلایەن دەوڵەتی تورکیاوە، کشتوکاڵ دەوەستێت، سەرەڕای نەبوونی ئاو، ژنان بەرەنگاری دەبنەوە و کارێکی زۆر دەکەن بۆ پەرەپێدانی کشتوکاڵ.
"ژنان کشتوکاڵیان دۆزیەوە و پەرەیان پێدا"
نەدا جەختی لەوە کردەوە کە خۆبەڕیوەبەری لە بواری ئابووریدا بۆ ژنان زۆر گرنگە و بەبیری هێنایەوە کە ژنان کشتوکاڵیان دۆزیوەتەوە و پەرەیان پێداوە و بەردەوامیشیان هەیە لە پێناو خۆبەڕێوەبەری، بە درێژایی مێژوو تەنانەت ژنان لە ڕێگەی کشتوکاڵەوە پزیشکییان دۆزیوەتەوە و ژیانی خۆیان و بوونی سەربەخۆی خۆیان لە ڕێگەی کشتوکاڵەوە بونیاد ناوە، کشتوکاڵ بەشێکە لە سروشتی ژنان و وتی: دۆخی خراپی کشتوکاڵ کاریگەریی نەرێنی لەسەر ژنان هەبووە؛ کاتێک ژنێک کێڵگەی کشتوکاڵی بەجێدەهێڵێت، ئەوە واتای ئەوەیە کە شتێکی لە سروشتی ناوەوەی خۆی بەجێهێشتووە، ئەویش پەیوەندییەکەی بە زەوییەوە.
"بڕینی پشکی سووریا لە ئاو گەورەترین جۆری توندوتیژییە"
نەدا حلۆ تیشکی خستە سەر توندوتیژی بەرامبەر بە ژنان و خاک و سروشت و ڕایگەیاند، بڕینی لێشاوی ئاوی ڕووباری خابور و بە گشتی لە وێستگەی دیلۆک و ئەوانی دیکە توندوتیژییە بەرامبەر بە ژنان و زەوی، ژنان ناچاربوون بتڵی ئاو بۆ ماڵەوە هەڵبگرن بۆ بەدەستهێنانی ئاوی خواردنەوە، گەورەترین جۆری توندوتیژییە، و وتی: کاتێک وشکەساڵی لە ڕووباری خابوردا ڕوودەدات، چۆن دەتوانێت ئاو بۆ کشتوکاڵ دابین بکات، هەر بۆیە دەبینین دەوڵەتی تورکیا و هاوپەیمانەکانی گەورەترین شێوەی توندوتیژی دژی ژنان و سروشت و زەوی لە سووریا ئەنجام دەدەن.
"دۆخی کشتوکاڵ خراپە بەهۆی ئاوی خوێ"
نەدا باسی لە دۆخی کشتوکاڵیشەداد و هۆل و ئاریشە کرد و ڕایگەیاند، کە کشتوکاڵی ناوچەکەیان لە دۆخێکی خراپدایە، ئاوی خوێش بۆ کشتوکاڵ گونجاو نییە و ئەمەش کاریگەری نەرێنی لەسەر ئابوورییان هەیە، لە شاداد و ئاریشە و هۆڵ ئاوی خوێ بەکاردەهێنرێت، بۆیە ئەوەی ئێمە دەیچێنین بەرهەمی باشی نییە و گەشە ناکات، ئەم دۆخە لە ڕووی دەروونیشەوە کاریگەری لەسەر ژنان دەبێت، چونکە کشتوکاڵ وەک بەشێک لە ژیانی خۆیان دەبینن.
"توندوتیژی ڕاستەوخۆ لە دەوڵەتە سەرمایەدارەکانەوە دێت"
نەدا لە کۆتایی قسەکاندیا ئاماژەی بەوەدا کە حکومەتی کاتی بۆ ماوەی ساڵێک لە دەسەڵاتدا دەبێت و چارەسەر بۆ قەیرانەکانی بەردەم گەلی سووریا پێشکەش ناکات؛ بە پێچەوانەوە دڕندانەترین پێشێلکاری ئەنجام دەدات، پێویستە حکومەت داوای مافی ئاو بۆ سووریا بکات نەک زیادکردنی پێشێلکارییەکان، ئەم توندوتیژییە ڕاستەوخۆ لە دەوڵەتە سەرمایەدارەکانەوە سەرچاوە دەگرێت و تورکیا لە پێشەنگدایە.