ناوەندی هەواڵ

 

ئێوارەی ئەمڕۆ لە گەڕەکی بەختیاری شاری سلێمانی، لە هەمان شوێنی شەهیدکردنی ژنە نووسەر و ئەکادیمیسیان و پێشەنگی ژنۆلۆژی زیلان ( ناگیهان ئاکارسەل) لەلایەن ڕێکخراوی ژنانی ئازادی کوردستان-ڕژاک و بە ئامادەبوونی ئەندامانی تەڤگەری ئازادیی و ژمارەیەکی بەرچاو لە ژنان و ئازادییخوازان، تاجەگوڵینەی ڕێز و وەفا دانرا و بەشکۆوە یادکرایەوە.

 

لە مەڕاسیمەکەدا بە درووشمی شەهید نامرێ و زیلان نامرێ، تاجەگوڵینەی ڕێز و وەفا لە شوێنی شەهیدکردنیدا دانرا، دواتر لەلایەن ڕووناک مەجیدەوە وتاری ژنانی ئازادی کوردستان خوێندرایەوە.

 

لە وتارەکەیدا ڕووناک مەجید وتی: لە کەسایەتی هەڤاڵ زیلان هەموو شەهیدانی ڕێگای ئازادیی بەبیردەهێنینەوە، بە ئامانجگرتنی ناگیهان ئاکارسەل بە ئامانجگرتنی تێکۆشانی ژنی ئازاد و ژنۆلۆژییە، کە شەهید ناگیهان لەو ماوەیەی لە باشووری کوردستان بوو سەرقاڵی تێکۆشانی زانستی ژن  و کۆکردنەوەی ئەرشیفی ژن بوو.

 

وتیشی: شەهید زیلان فکرێک بوو فەلسەفەیەک بوو، توانی مێژووی ژنان بگەڕێنێتەوە سەر ڕاستەڕێی خۆی، دوژمن هەمیشە ئەو کەسانە بە ئامانج دەگرێت کە کاریگەری و هێزێکیان هەیە، بە شەهیدکردنی هەڤاڵ زیلان سەدان و هەزاران زیلانی تر لەدایک دەبن.