ناوەندی هەواڵ

 

وەزارەتی ناوخۆی تورکیا بە دانانی قەیوم لە دێرسیم و پولور سەرۆک شارەوانی ئەو شارانەی لە کارەکانیان دوورخستەوە, ئەم کارەی دەوڵەتی تورکیا بووە هۆی کاردانەوەی ناڕەزایی خەڵک و گردبوونەوە لەبەردەم شارەوانییەکان.

 

شارەوانی دێرسیم لەژێر بەڕێوەەری پارتی یەکسانی و دیموکراسی گەل، دەم پارتی و شارەوانی پولور لەژێر بەڕێوەبەری پارتی کۆماری گەل "جەهەپە" بوو، کە سەرۆک شارەوانییەکانی بە تۆمەتی "ئەندامێتی لە ڕێکخراو و گروپە نایاساییەکان"  لە چەند ڕۆژی ڕابردوودا زیاتر لە ٦ ساڵ زیندانیان بەسەردا سەپێندرا.

 

لە ئەنجامی ئەم چالاکییەدا سەدان کەس لە بەردەم بینای شارەوانی کۆبوونەوە و بە دەستوەردانی هێزەکانی دەوڵەتی تورکیا، کۆبوونەوە گشتییەکان بەرەو توندوتیژی ڕۆشتن و سەرەڕای هەوڵەکانی هێزە ئەمنییەکانی دەوڵەتی تورکیا بۆ بڵاوەپێکردنی خۆپیشاندەران، ئەوان بەردەوام بوون لە ناڕەزایەتیەکانیان.

 

دانانی قەیوم لە کاتێکدا بووە کە ژمارەیەکی زۆر لە ژنان و چالاکوانانی مافی ژنان لەم بارەوە گردبوونەوەی ناڕەزایەتییان ئەنجامداوە و دانانی قەیومیان بە "شێوەیەکی دامەزراوەیی توندوتیژیی دەوڵەتی پیاوان" زانیوە و ئەم کارەیان لە دژی ژنان و شێوازێکی ژنکوژی ناوبردووە.

 

ئەمە لە کاتێکدایە کە بەرەبەیانی ئەمڕۆ دەوڵەتی تورکیا شارەوانیی دێرسیمیان بە بەربەستی کۆنکرێتی گەمارۆدا و گەلیش بەردەوامن لە بەرخۆدانیان.