هێلین ئەحمەد

 

سلێمانی- گەلی کورد بە ئیرادەی خۆی لە هەموو قۆناغەکانی تیکۆشاندا بۆ چەسپاندنی ناسنامە و کولتوور و زمانی خۆی خەباتی کردووە، ئەم ئیرادەیەی کورد پێچەوانەی ویستی داگیرکەرانە کە دەیانەوێت زمانی کوردی لەناوببەن و کورد لە هیچ شوێنێکدا بوونی نەبێت، بەڵام کورد سەرەڕای هەموو قڕکردن و کۆمەڵکوژییەکان و هەوڵدان بۆ تواندنەوەی گەلی کورد، لە تێکۆشانێکی نەوەستاودایە.

 

هەڵبژاردنەکانی باکووری کوردستان و تورکیا قۆناغێکی دیکەی بەرخۆدانی گەلی کورد بوو، کە لە دوای شۆڕشی ڕۆژئاوای کوردستان توانی یەکگرتووی گەل بەرامبەر فاشیزم و دیکتاتۆر و دەسەڵاتدار نیشان بدات، بە هێز و ئیرادەی گەل زیاتر لە ٧٥ شارەوانی بەدەستهات، ئەم هەڵبژاردنە باستراوە بە باشووری کوردستانیشەوە و گۆڕانکاری و سەرکەوتنەکانی گەل لە باکوور، گۆڕانکاری لە باشووردا دەخولقێنێت.

 

"هەڵبژاردنەکانی باکووری کوردستان وەچەرخانێکی جیاواز بوو بۆ کورد"

ڕوناک مەجید، ئەندامی دەستەی بەڕێوەبەرایەتی تەڤگەری ئازادی کۆمەڵگەی کوردستان، باس لەوە دەکات، سەرەڕای ئەو هەڵبژاردنانەی لە باکووری کوردستان و ئەو فشارانەی لەسەر گەلی کورد هەبوون لەلایەن دەوڵەتی داگیرکاری تورکیاوە، کورد توانی زۆرترین شارەوانی بەدەستبهێنێت، وتیشی: هەڵبژاردنی شارەوانیەکانی باکووری کوردستان لە ڕۆژهەڵاتی ناوەڕاست و بۆ پێگەی گەلی کورد وەچەرخانێکی جیاواز بوو، هەروەک چۆن کورد لە ڕۆژئاوای کوردستان بە پێشەنگایەتی ژنان توانی دژ بە داعش بوەستێتەوە، لە باکووریش سەرەڕای زیندانی کردن و بڵاوکردنەوەی ماددە هۆشبەرەکان و دەستدرێژیکردنە سەر ژنان بەڵام کورد توانی شارەوانی لە ناوچە کوردیەکاندا بەدەستبهێنێت.

 

هەروەها وتی: لە دوای هەڵبژاردن دەوڵەتی تورکیا دەیویست بە لابردنی هاوسەرۆکی شارەوانیەکان و دانانی قەیوم دەسەڵاتی خۆی بسەپێنێت، بەلام سەرهەڵدانی گەل لە وان هەموو خواستەکانی دەوڵەتی تورکیای تێکشکاند، ئێمە دەتوانین گەلی باشووری کوردستان بە ئیرادەی گەلی باکووری کوردستانەوە ببەستینەوە، گەلی باشووری کوردستان دەتوانێت هەمان هەڵوێستی باکووری کوردستانی هەبێت، وەک چۆن فەرمانبەران و مامۆستایان لە شاری سلێمانی و دەوروبەری ڕژانە سەر شەقامەکان و توانیان مووچەی مووچەخۆرانی هەرێمی کوردستان لە عێراقدا بچەسپێنن، ئەم یەکگرتنانەی گەلی کورد دەتوانێت سەرکەوتنەکانی کورد لە هەر جێگایەک بێت، بە ئەنجام بگەیەنێت.

 

" داهاتووی ئەردۆغان بەندە پەدەکەوە"

ڕوناک مەجید، ئاماژەی بەوەکرد، هەڵبژاردنەکانی باکووری کوردستان بە نوێنەرایەتی کورد لە ناوچە کوردنشینەکاند توانی سەرکەوتنێکی مەزن بەدەست بهێنێت، دەشڵێت: لە ئەنقەرە، ئیزمیر و ئەستەمبوڵ، کە ئەردۆغان لێی دۆڕا جەهەپە بە بێ کورد نەیدەتوانی تێیدا سەربکەوێت، وەک چۆن مەڕاڵ دانش بێشتاش بە ئیمام ئۆغڵوو دەڵێت، هیچ کات سەرکەوتوو نەدەبویت ئەگەر کورد دەنگی پێت نەدایە، ئەم سەرکەوتنە دەریدەخات کورد لێرەدا توانایەکە یان هێزێکە دەتوانێت گۆڕانکاری دروست بکات، ئەم سەرکەوتنانەی کورد لە باکووری کوردستاندا دەنگدانەوەیەکی گەورەی هەبوو، کە لە ئێستادا هەموو جیهان چاوی لەسەر ئەوەیە کورد دەتوانێت جارێکی دیکە لەسەر پێی خۆی بووەستێت، هەروەها لە ڕۆژهەڵاتی کوردستان ژنانی کورد توانایەکی جیاوازی هەیە لە بەرەوپێشبردنی توانای ژنانی کورددا.

 

ڕوناک مەجید باسی لەوەکرد، هەڵبژاردنەکانی باشووری کوردستان پەیوەستە بە هەڵبژاردنەکانی تورکیا و باکووری کوردستانەوە، دواکەوتنی هەڵبژاردنەکان چەند هۆکاریکی لە پشتەوەیە، ئەوانیش نەمانی ١١ کورسی کۆتاکان هۆکارێکە بۆ بەشداری نەکردنی پارتی دیموکراتی کوردستان-پەدەکە، کە ئەگەر ٥١ نەهێنێت لە پەڕلەماندا ناتوانێت حکومەت دروست بکات، وتیشی: پەدەکە بەشداری بکات دۆڕاوە، بەشداریش نەکات دۆڕاوە، بۆیە لێرەدا چاوەڕوانی هەڵبژاردنەکانی باکووری کوردستانیان دەکرد، چونکە داهاتووی ئەردۆغان بەندە پەدەکەوە، لەگەل شکستی تورکیادا پەدەکە کشانەوەی لە هەڵبژاردنەکان ڕاگەیاند".

 

ڕوناک مەجید، ئاماژەی بەوەشدا، تێکدانی هەڵبژاردنەکان لە باشووری کوردستاندا دەگەڕێنیتەوە بۆ هەڵبژاردنەکانی باکوور و هەبوونی دەستی ئەدۆغان، "بەشداری نەکردنی پەدەکە لە هەڵبژاردنەکانی باشووردا بە ئەمری ئەردۆغان بووە، تا بتوانێت قەوارەی خۆی لە باشووری کوردستاندا بهێڵێتەوە، بەڵام بە بەشداری نەکردن یان دەنگ بە دەستنەهێنانی پەدەکە هەڵگیرساندنی شەڕێک دەبێت لەلایەن پەدەکەوە، ئەم بارودۆخەش کاریگەرییەکی خراپی لەسەر هەر چوار پارچەی کوردستان دەبێت، چونکە سیاسەتەکانی لە کوردستاندا هەن گرێدراوی یەکدین، بۆیەدەبێت هەرچۆنێک بێت ئەم ستاتۆیە بمێنێتەوە،  بەڵام دەتوانین گۆڕانکارییەکی جدی تێدا بکەین بۆ ئەوەی بتوانین پێگەی گەلی کورد جارێکی دیکە لە عێراقدا پێگەی خۆی هەبێت، بەڵام بەدەر لە پەدەکە چونکە بەردەوام لەگەڵ دوژمنان دایە".