شیا کۆیی

 

کۆیە-هەرچەندە لە شاری كۆیە هەلی كاری كەمە و زۆربەی خەڵكەكەی بژێوی ژیانیان لەسەر موچەیەو فەرمانبەرن، بەڵام لەگەڵ ئەوەش هاوشێوەی شارەكانی دیكەی كوردستان، لە كۆیە  چەند ساڵێكە زۆرترین دوكانی نان كردن كراوەتەوە وهەر دوكانێك نزیكەی ١٠ ژن زیاتریش كاری تێدادەكەن، نانی كۆیە دەروات بۆ شارەكانی دیكەی كوردستان، بەم هۆیەوە دەیان ژن هەلی كاری بۆ ڕەخساوە، ژنیان تێدایە دەرچووی زانكۆیە هەیە ژنە پێشمەرگەیە وهەیە هاوژینی شەهید بووە، لەگەل ئەوەشدا زۆربەی ژنەكان هێشتا لایان ناخۆشە دەربكەون، نوژنها بۆ ئەم راپۆرتە سەردانی پینج شوێنی نان كردنی كرد تا توانی ئەم چاوپێكەوتنە بكات لەكاتێكدا نان كردنیش هەروەك پیشەیەكی ئاسایی دیكەیە.

 

نارنج  ڕەفیق بەهۆی ئەوەی كارێكی هەمیشەیی نەبووە و دانەمەزراوە لە كەرتی گشتی لەچەندین شوێن كاری كردووە، دواین كاری ئێستا نان دەكات لە دوكانێكی نان كردن، باسی لەوەکرد کە چۆن بوێرانە بە ماندوو بوون و ڕەنجی دەستی خۆی شەش منداڵی بێ باوكی گەورە كردووە وتی: سەرەتا خۆم دوكانم دانا بەڵام دوایی بۆم نەگونجا دوكانەكەم هەڵگرتەوە، ئێستا وەك كارمەندێك لێرە كاردەكەم رۆژانە لە كاتژمێر ١٢ی نیوەرۆوە دێم تا نۆی شەو جاری واشە زووتر لێدەبینەوە.

 

"هەركارێكی گونجاوم هاتبێتە پیش كردوومە تا چاوم لەدەستی كەس نەبێت تەنانەت حكومەتیش"

نارنج وتیشی: گەر هەوڵبدەی ئیش زۆرە  كاركرن جێی شانازییە، من لەچەندین شوێن كارم كردووە، چوار ساڵ لە پەیمانگایە وەك چیشتلێنەر ئیشم كردووە و سێ ساڵ  لە زانكۆی كۆیە ئیشم كردووە، پێشتریش لە بەڕێوبەرایەتی مافی مرۆڤ چایچی بووم و کە خوێندنگەکانیش چایچی بووم، هەركارێكی گونجاوم هاتبێتە پیش كردوومە تا چاوم لەدەستی كەس نەبێت تەنانەت حكومەتیش، دواكارم ئێستا دوو ساڵە لێرە نان دەكەم زۆرشانازیشی پێوە دەكەم چونكە چاوم لەدەستی كەس نەبووە، شەش منداڵی هەتیوم بەخێو كردووە بی ئەوەی پێویستم بەدەستی كەس هەبێت و ئێستا منداڵەكانم دامەزراندووەو چوونەتە ماڵی خۆیان.

 

نارج باسی ژنی كوردی کردو بەئازا ناویانی بردو وتی: لەژنی كورد مەردترو ئازاتر نییە، بەتوانان، گەر ئێستا من بە ئازایی خۆم نەبوایە سێ مانگە موچە نەهاتووە دەبوو چاوم لەدەستی خەڵك بێت، بەڵام تا بمێنم حەزناكەم چاوم لەدەستی كەس بێت.

 

سەبارەت بەوەی خواستی نان لەسەر چ جۆرێكە و ڕۆژانە چەند نان دەكەن نارج وتی: هەركەسەو بەویستی خۆی هەیە دەڵێت نانی جۆم دەوێت هەیە دەڵێت نانی بەرەشكەو شمڵی یان نانی بۆر یان سپی و ساف و گەنم، بەم جۆرە لەسەرخواستی ئەوان نان دەكەین، رۆژانە هەشت هەشت كەس لێرە نان دەكەین، ئیمە لەگروپێکی ئیوارانین و رۆژانە نزیكەی ٢٠٠ یان ١٥٠ نان دەكەین بەهۆی بێ موچەیی بازاڕی ئێمەش كز بووە، هەرچەندە جگە لەناو شاری كۆیە لەشارەكانی دیكەش كڕیارمان هەیە نانمان نامێنتەوە.

 

نارنج ڕەفیق لە کۆتایی قسەکانیدا داوای لە ژنان کرد کار بکەن و وتی: ژن لەماڵەوە توشی  خەمۆكی و بێزاری دەبێت بەڵام گەربێتە دەرەوە، دڵخۆش دەبێت، ئیمە لێرە رۆژانە گفتوگۆ دەكەین پێدەكەنین، بۆیە هیوادارم هەموو ژنان هەوڵبدەن كاری تایبەت بەخۆیان هەبێت، چاویان لەدەستی كەس نەبێت تەنانەت چاویان لەحكومەتیش نەبێت.
 

"هەشت ژن بە دوو گروپ نان دەکەین"

شەونم ئەسكەندەر، خاوەنی شوێنی نان كردنەكەیە لەبارەی بیرۆكەی دانانی ئەم شوینە وتی: سەرەتا خۆم ماوەی هەشت ساڵ كاری نانكردنم دەكرد لەشوێنێكی دیكە، بەڵام دوایی بیرم كردەوە خۆم شوێنێک دابنێم، ئەو دوكانەم گرت كە هەشت ژن كاری تێدادەكەین بە دوو گرووپ، زۆر لەبەر ئیشەكەم ئاسوودەم و ژنەکان زۆر باشن، ئیشەكە بەجوانی بەڕێوە دەبەن و نانیان جوانە دەستخۆشیان لێدەكەم و كڕیارەكانیش زۆر حەزیان لە نانەكەیە.

 

شەونم وتیشی: بۆ بابەتی خاوێنی زۆر بەپاكوخاوێنی كارەكانمان دەكەین چونكە پاكوخاوێنی لەسەروی هەموو شتێكە دوای كارەكان هەویرشێلەكەو شوێنەكە زۆرپاك دەكەینەوەو بەو شێوەیە جێی ناهێلین، بۆ نان كردن گرنگە كە ئارەدەكەش خاوێن بێت ئەسپێی لێنەدابێت، چونكە ئەوها تامی ناخۆشە و كڕیارەكان جارێکی تر نایەنەوە منیش نامەوێت كریارەكانم لەدەستبدەم .

 

شەونم  ئەسکەندەر لە کۆتایی قسەکانیدا ئاماژەی بەوەشكرد نانكردن هەرچەندە قورسە بەڵام گەر بژێوی ژیانتی لەسەربوو لەشانت خۆشە وتی: من كاتێك نانم دەكرد منداڵەكانم ساوابوون لەگەڵ خۆم دەمبردن و هیچیان لێنەهات ئیستا گەورە بوون، بەڵام ئیش خۆشە كاتێك منداڵەكەت داوای شتێكی كرد نالێی نییە، بۆیە هیوادارم ئەو ژنانەی لەماڵەوەن ئیش بكەن بۆ ماڵو منداڵی خۆیان.