ئاسودە محەمەد

شارەزوور- بەبۆنەی هاتنی بەهار و نەورۆز ڕێکخراوی ماڵی خەونەکان بە هاوبەشی سەنتەری گەشەپێدانی چالاکی لاوان، کەرنەڤاڵی نێرگزی بۆ نمایشکردنی کاری دەستی، جوانکاری، پێشەنگای هونەری و فۆتۆگرافی و نمایشی جلی کوردی لە هۆڵی سەنتەری گەشەپێدانی چالاکی لاوان لە شارۆچکەی سەیدسادق کردەوە.

 

پەیام نەجمەدین، ڕێکخەری کەرنەڤاڵەکە، ئاماژەی بە گرنگی خستنەڕووی توانا و بەهرەی ژنانی شارۆچکەی سەیدسادقی دا و وتی ئەمە پێشوازی و دەستپێکی وەرزی بەهارە.

 

ئارەزوو ئەرکان، ژنێکی گەنجی دەرچووی پەیمانگایە، یەکەمجارە بەشداری پێشانگا بکات، ئارەزوولە ڕێگەی ئۆنلاینەوە کارە دەستی و جوانکارییەکانی دەفرۆشێت و کڕیارانی لێی ڕازین.

شەکوا پەشێو، کارەکەی دروستکردنی درەختە بە شێوەی موروو و زەنگیانە، ئەم کارەی خواستی زۆر لەسەرە چونکە بەسەلیقەی ژنێکی دەستڕەنگین دروستکراوە.

 

شەهلا محەمەد، مێزەکەی بە خواردن و شیرینی کوردەواری و دەستکردنی خۆی ڕازاوەتەوە، ئەگەرچی پێشتر کاری فۆرشرنی نەکردووە، بەڵام وەک خۆی دەڵێت خولیای دروستکردنی شیرینی و خواردنی هەیە.

 

مونیرە ژنێکی دیکەیە کە لە کەرنەڤاڵەکەدا بەشدارە، تابلۆکانی شێوازێکی جوان و جیاوازی بە پێشانگاکە بەخشیوە، کاری ڕەیزن و جوانکاری ژنان دەکات، مونیرە لە ڕیگەی ئۆنلاینەوە کارە هونەرییەکانی دەفرۆشێت.

 

ت.پ