سلێمانی

 

 پێشانگای شاماران لە لایەن هونەرمەند ناز عەلی عەوڵا لە سلێمانی کرایەوە، پێشانگاکە بە ناوی "شاماران لە باخی سێوان"، سێهەمین پێشانگای تایبەتە بە هونەرمەند ناز عەلی و یەکەمین جارە لە سلێمانی دەکرێتەوە، پێشانگاکە ٣٠ تابلۆ لەخۆ دەگرێت و ماوەی دوو هەفتە دەخایەنێت، ڕۆژانە لە کاتژمێر ١٠ بۆ ٤ ی پاشنیوەڕۆ بەردەوام دەبێت.

 

سەبارەت بە ناوی پێشانگەکە ناز عەلی دەڵیت" شاماران خۆی ناوێکی کوردی ڕەسەنە، خوداوەندی مێینەیە و بە واتای خوداوەندی زانست و زانیارییەکە  نەتەوەی کورد لە کۆندا باوەڕییان پێی هەبووە و لەلایان پیرۆزبووە و لە ماڵەکاندا هەڵیان واسیووە، بەڵام من وەکو ڕەمز کارم لەسەر نەکردووە، بەڵکو دیوی شاراوەی پشت شامارانم نیشانداوە کە چی وای لە کورد کردووە باوەڕییان پێی هەبێت و بەستومەتەوە بە دارستانەکانی بەهەشتەوە کاتێک دایکە حەوا سێوێکی تاقی کردۆتەوە و دوای ئەوە پرسیار بە پرسیار ژیان بەرەوپێشەوە دەڕوات ".

 

کارکردن لەسەر تابلۆکان ماوەی ساڵ و نیوێکی خایاندووە و کارەکانی پێشانگاکە هەمووی باسی شاماران ناکات، هەر کۆمەڵە تابلۆیەک باسی شتێک دەکات بەشێکیتریان باس لە بڕینەوەی دارەکانی کوردستان دەکات، ناز عەلی باسی لەوەکرد کە نەتەوەی کورد هەمیشە دار، شاخ و دەشتی بە پاڵپشتی خۆی زانیووە و دەڵێت: " هەرچەندە ئێمە شانازی بە سروشتی جوانی کوردستانەوە دەکەین بە شاخ و دار بەڵام ڕۆژانە دەبینین چەندین دار دەبڕدرێتەوە دەیانسووتێنن، خەریکە دارستانەکانیشمان لێ دەستێننەوە، هەر وەک چۆن شامارانیان لێسەندینەوە و هەوڵدەدەن لە مۆرکی کوردی لایبەدەن."

 

ناز عەلی دەشڵێت کارەکانی خۆشدەوێت و لەگەڵ خۆیدا دەیژیەنێت، "من هیچ هیلاک نابم بە کارەکانمەوە و لەگەڵ خۆمدا دەیانژییەنم و بیر لەوە ناکەمەوە لە کاتێکی دیاریکراودا تەواوی بکەم، ئێمەی کورد ئاشق بوون بە ڕەنگ لە دەمارەکانماندایە ئەمەش هەر لە جلە کلتورییەکانمانەوە دیارە کە چەندێک ئاشقین بە ڕەنگ و ڕوناکی و ژیان."

 

هونەرمەند ناز باسی لەوەشکرد کە ئەرکی هونەرمەند و سیاسییەکانە مێژوو و ڕاستییەکان نیشانی نەوەکانی داهاتوو بدات کە خەریکە لەبیر دەکرێت بۆیە زۆر گرنگە لە هونەردا باسی شاماران و دارستانەکان بخرێتە بەرباس چونکە هونەر تەنها خۆنمایش کردنێکی بێ واتا نییە، هونەر گێڕانەوەی ئازارە، هەڵگەڕانەوەیە لە دابوونەریتی سیاسی و ئاینی".