زهور مەشرقی

تونس-ئەزمونی هونەرمەندی تونسی زەهرا زەروق بەرجەستەی چیرۆکێکی سۆز و خولیایە کە سنووری داهێنان تێدەپەڕێنێت، دەبێتە گەشتێک بۆ گەڕان بەدوای جوانی و یادەوەری و مرۆڤایەتیدا، هونەرمەند لە ڕێگەی هونەری ئەبرۆوە کە ئاو دەگۆڕێت بۆ ئاوێنەیەکی ڕەنگ و ڕۆح، جیهانێک ئاشکرا دەکات کە پیشەسازی لەگەڵ مێژوودا تێکەڵ دەبێت، لێهاتوویی لەگەڵ شوناس، زیندووکردنەوەی میراسێکی بینراو کە بۆ چەندین سەدە بەشێکە لە یادەوەریی بەکۆمەڵی پەرتوک و هونەر لە تونس.

 

لە گفتوگۆیەکی پڕ سۆزدا، هونەرمەندی تونسی زەهرا زەروق، گەشتە ناوازەکەی خۆی لەگەڵ هونەری ئەبرودا باسکرد کە بە "نیگارکێشان لەسەر ئاو" ناسراوە، وتی: پەرتوکەکانی ئەو سەردەمە بە کوالیتی و کاری دەستی ناوازەیان جیا دەکرانەوە (Le Reliure)، پێستی ئاژەڵە بەهێزەکان لە دەرەوە لەگەڵ کاغەزی ئەبرو تێکەڵ کرابوو، کە بە نەخشی مەڕمەڕ لە ناوەوە ڕەنگکرابوو، ئەم پێکەوەگرتنە تەنها جوانکاری نەبوو، بەڵکو ڕەنگدانەوەی پەرەسەندنێک بوو لە تەکنیکەکانی پاراستن و بەستنەوە، کە ڕێگەی بە پەتوکەکانی تەمەن سەرووی ٢٠٠ ساڵ دا تا ئەمڕۆش شکۆمەندی خۆیان بپارێزن.

 

ئەم شێوازە هونەرییە بەڵگەیە لەسەر کراوەیی کولتووری تونس و پابەندبوونی بە بەدەستهێنانی باشترین نموونەی پیشەسازی دەستی لە سەرانسەری جیهان بۆ پاراستنی میراتی ئایدۆلۆژیایەکەی.

 

 

هونەر پەناگەیە

هونەرمەند زەهرا زەروق جەختی لە ڕۆڵی سەرەکی هونەر لە چاککردنەوەی پەیوەندییە کۆمەڵایەتییەکان و پاڵاوتنی ڕۆحی مرۆڤ کردەوە، وتی: ئەو وۆرکشۆپانەی هونەری ئەبرو کە سەرپەرشتی دەکات، تەنها کەشی ڕاهێنانی تەکنیکی نین، بەڵکو شوێنی کۆبوونەوەن بۆ چیرۆکی مرۆیی جیاواز.

 

ڕوونیکردەوە، کە فێرخوازەکان لە پاشخان و گروپی تەمەنی جیاوازەوە هاتوون، لە بیستەکانی تەمەنەوە تا هەشتاکانی تەمەن، لە هونەردا شێوازێک لە چارەسەری دەروونی و کەشی دەربڕینی چیرۆکە کەسییەکانیان دەدۆزنەوە، کە هەموویان یەکدەگرنەوە و دەبنە یەک کاری هونەری.

 

جەختیشی لەوە کردەوە، کە هونەر بەهێزترین ئامرازە بۆ ڕووبەڕووبوونەوەی نەخۆشی و گرژییە کۆمەڵایەتییەکان، بە "ڕزگارکەرێک" پێناسەی دەکات کە ڕەوشت دەچێنێت و وزەیەکی ڕۆحی بە تاکەکان دەبەخشێت کە تەنانەت لە ڕواڵەت و ڕەفتاری ڕۆژانەشدا جیایان دەکاتەوە.

 

 

لە پەیامێکدا، بۆ خێزانەکان داوای لێکردن منداڵان بەرەو کارە داهێنەر و هونەریەکانی وەک مۆسیقا و شانۆ و وێنەکێشان ڕێنمایی بکەن، لەبری ئەوەی ڕێگەیان پێبدەن لە تەکنەلۆژیادا نوقم بن، وتی: لەبری مۆبایل فڵچەی بۆیاخ بە منداڵەکانتان بدەن، با وزەی خۆیان بخەنە سەر کاغەز و دیوارەکانەوە، باشترە لەوەی ڕێگەیان پێبدرێت بە ڕەفتاری لادان کۆمەڵگە بشێوێنن، هونەر بە تەنها دەتوانێت کۆمەڵگەیەکی تەندروست و هاوسەنگ بونیاد بنێت.

 

ئەو پێداچوونەوەی بە گەشتە توێژینەوەکەیدا کرد، کە گەیشتە لوتکە بە بڵاوکردنەوەی پەرتوکەکەی "طواف في محراب الماء"، یەکەم پەرتوکە لە جۆری خۆیدا بە زمانی عەرەبی کە مێژوو و تەکنیک و لایەنە ڕۆحییەکانی ئەم شێوازە هونەرییە بەڵگەدار بکات، بەتایبەتی لەناو چوارچێوەی تونسدا لە سەردەمی حوسێنییەکانەوە، هەروەها باسی لە دەستکەوتە نێودەوڵەتییەکەی کرد کە میدالیای برۆنزی بەدەستهێناوە لە پێشبڕکێی نێودەوڵەتی داهێنان لە ئوسترالیا، کە لەسەر بنەمای توێژینەوەیەک کە لێکۆڵینەوەی لە وزەی ئاو و ڕەنگەکان کردووە، جەختی لە ڕۆڵی خۆی کردەوە لە زیندووکردنەوەی ئەم میراسە هونەرییە و پێشکەشکردنی وەک ئاماژەیەکی ئەکادیمی و داهێنەرانە لە جیهانی عەرەبی و ئەفریقا.

 

 

ئەبرو: ئەزموونێکی مرۆیی

 

ڕوونیکردەوە، کە پەیوەندی نێوان دایکی هونەرمەند و منداڵەکانی چاودێریکردنی نەریتی تێدەپەڕێنێت، دەگۆڕێت بۆ ئەزموونێکی قووڵتر و دەوڵەمەندتری مرۆیی، دایکایەتی کە لەگەڵ فڵچەی هونەر و ڕاستیەکانی ژیاندا تێکەڵ بووە، ڕەهەندی بینراو و دەروونی جیاواز بەدەست دەهێنێت، دەرفەتێکی ناوازە دەدات بە منداڵ بۆ گەشەکردن لە ژینگەیەکدا کە داهێنان و هۆشیاری پەروەردە دەکات، وتی: دایکایەتی هونەری، دیدێکی جیاواز بۆ شتەکان دروست دەکات، هەرچەندە ڕۆڵی دایکایەتی بۆ هەموو ژنان هەستیێکی بوون و قووڵە، بەڵام دایکی هونەرمەند خاوەنی دیدێکی ناوازەیە کە کاریگەری ئەرێنی لەسەر باشی دەروونی منداڵەکە هەیە، هەروەها گەورەبوون لەگەڵ دایکێک کە پیشە یان پسپۆڕییە نەریتییەکانی دیکەی ئەنجامداوە.

 

 

لە یاریکردن بە فڵچەیەکەوە بۆ هۆشیاری کۆمەڵایەتی

 

ئاماژەی بەوەشکردووە، منداڵێک کە لە ستۆدیۆی دایکیدا گەورە دەبێت، لە سەرەتای ساڵانی سەرەتاییەوە دەست دەکات بە گەڕان بە جیهاندا لە ڕێگەی ڕەنگ و فڵچە، ئەم کارلێککردنە سەرەتاییە تەنها کات بەسەربردن نییە، بەڵکو ئامرازێکە بۆ بونیادنانی کەسایەتییەکی جیاواز و ناوازە لەناو کۆمەڵگەدا، خاوەنی ئاستێکی بەرزی هۆشیاری و توانای دەربڕینی خۆیان، مەرج نییە داهاتووی منداڵ تەنها لە هونەرە بینراوەکاندا سنووردار بێت، بەڵکو ئەم بناغە جوانکارییە ئاسۆ بۆ باشی لە بوارەکانی دیکەدا دەکاتەوە، جا چ ئەدەبی بێت، زانستی بێت، یان وەرزشی.

 

 

لە بچووکترین نووسەرەوە بۆ پاڵەوانی وەرزشی

 

ئەو هونەرمەندە ئەزموونی تایبەتی خۆی لە پەروەردەکردنی کچەکەی دەهێنێتەوە کە لە تەمەنی شەش ساڵییەوە دەستی بە گەشتە داهێنەرەکەی کردووە، لە کاتی بەشداریکردنی لە کۆڕێکی هونەری و ئەدەبیدا خەڵاتی "گەنجترین نووسەر لە تونس"ی بەدەستهێنا، بە نووسینی شیعر و بەشداریکردنی چالاکانە لە فێستیڤاڵە ئەدەبییەکان و پێشانگاکانی منداڵان، خۆی جیاکردەوە.

 

ئەمڕۆ کچەکە تەمەنی هەژدە ساڵە و خۆی ئامادە دەکات بۆ ئەنجامدانی تاقیکردنەوەکانی بەکالۆریۆس، لەسەر بنەمای پاشخانی باشی ئەکادیمی و وەرزشی، خولیای سەرەتایی بۆ هونەر و جوانی وای لێکرد بەرەو "جیهانی دەریاکان" و وەرزشی ئاوی هەنگاو بنێت و پاڵەوانێتی و میدالیای بەدەستهێنا.

 

 

هونەرمەند زەهرا زەروق لە کۆتایی قسەکانیدا، وتی: گەورەترین دیاری کە هونەر دەتوانێت پێشکەشی دایکایەتی بکات، توانای پەروەردەکردنی تاکێکی سەرکەوتوو و خۆگونجاندنە، کە توانای ئەوەی هەبێت سوود بە کۆمەڵگە و وڵاتەکەیان بگەیەنێت.