پەرژین حەکیم

 

تاران- هەموو شتێکی شار ئارام دیارە، هاوڵاتیانی تاران ئێوارەیەک لە پارک و شوێنە گشتییەکان بەسەردەبەن، منداڵان لەگەڵ دایک و باوکیان پیاسە دەکەن، بەساڵاچووان لەگەڵ هاوتەمەنەکانیان دانیشتوون و باسی یاداوەری ڕۆژانی گەنجی بۆ یەکتر دەکەن، گۆرانیبێژێک گۆرانی دەڵێت و خەڵکیش چەپڵەی بۆ لێدەدەن.

 

شار هێندە ئارام دەردەکەوێت، وەک ئەوەی چەند مانگێک لەمەوبەر لە شەقامەکانی شاردا جەنجاڵییەک دروست نەبووبێت، بەڵام نەخێر لە شەقامەکان شۆڕشێک هەبوو، دروشمی کوشندە و شەرمەزارکەر لەلایەن سەرکردەکانی حکومەتەوە بەرزکرانەوە، خوێن ڕژا و منداڵی بێتاوان کوژران و تەقەیان لێکرا.

 

هەموو شتێک ئارام دەردەکەوێت و ئەگەر دڵ بەو بێدەنگیە بدرێت، وا دیارە هەموو شتێک کۆتایی هاتووە، بەڵام کاتێک تەماشای ڕووخساری ژنان دەکەیت شەپۆلێکی گەردەلولاوی و توڕەی لە نیگاکانیاندا دەردەکەوێت، وەک ئەوەی خۆیان بەهێزێکی زیاترەوە لە پێشووتر ئامادەبکەن و بوەستنەوە.

 

گومانی تێدانیە، گەل خاوەنی شەقامە و شۆڕش لە ناخیدا هەڵدەستێت، بەڵام ئێستا کە شەقامەکان چۆڵ بوون بە مانای کۆتایی ڕاپەڕین نایەت، ئەو شەقامە بۆ هەتا هەتایە بە چۆڵی نامێنێتەوە، ئەو شەقامە چاوەڕێی پریشکێکی نوێی شۆڕش و ناڕەزایەتی گەل دەکات، دروشمەکان بە دەنگی بەرزتر دەست پێبکەنەوە و لە کۆتایی شەودا هاوار لە سەربانەکان و پشت پەنجەرەکان "مەرگ بۆ دیکتاتۆر" تەواوی شار بهەژێنێت، لە شۆڕشی "ژن، ژیان، ئازادی"دا هیچ شتێک لەبیر نەکراوە.

 

شۆڕش بریتییە لە گۆڕانکاری لە شێوازی بیرکردنەوە و شێوازی ژیان، شۆڕش ئەو کامێرا و قەڵەمانەیە کە بوونەتە چەک، شۆڕش گۆرانی و سەمانی ژنانە، نیگای ئیرادە و بریقەی گەشاوەی چاوی ئەو ژنانەیە کە ڕۆژانە هەنگاوەکانیان بەهێزتر دەبێت و بەڵێنی داهاتوویەکی نوێ دەدات...!

 

لە نێو جەنجاڵی "پارکی ئەندێشە" لە تاران لە ناوەڕاستی ترس و هیوادا، لە ژنان دەربارەی شۆڕشی "ژن، ژیان، ئازادی" دەپرسم.

 

پێت وایە شۆڕشی ژنانی ژیانی ئازادی بۆ کوێ دەڕوات؟

میهران حەمیدی، تەمەنی ٤٨ ساڵ لەسەر کورسییەک دانیشتووە، ئاماژە بە گەشەسەندنی کولتووری دەکات بۆ ئەوەی هەر گۆڕانکارییەک لە کۆمەڵگە دروست ببێت و وتی: " گەشەسەندنی کولتووری بناغەی گەشەسەندنی کۆمەڵگەیە، سەرەتا دەبێت کولتوری کۆمەڵگە جێگیر بکرێت بۆ ئەوەی شۆڕشی "ژن، ژیان، ئازادی" قبوڵ بکات، لە خەڵک بێهیوا دەبم بۆ نمونە کاتێک دەبینین ژمارەیەکی زۆر لە مەراسیمی جەژنی غەدیر بەشداربوون دوای تێپەڕبوونی نزیکەی ساڵێک بەسەر ڕاپەڕین و ناڕەزایەتیەکانی خەڵک، جەژنێک کە دەسەڵاتداران بەمەبەست بەڕێوەی دەبەن، خەڵک ئامادەیییەکی بەرچاویان تێدا هەبوو، نەک لەبەر باوەڕە ئایینیەکانیان، بەڵکو تەنها بۆ دەستکەوتنی خۆراکی چەند ڕۆژێک! نائومێدکەر بوو."

 

لە درێژەی قسەکانیدا وتی: "ڕەنگە دوای هەڵبژاردن هەموو شتێک زیاتر ڕوون ببێتەوە،  دەبێت بزانین بەشداریی خەڵک چۆن دەبێت لە هەڵبژاردنی داهاتووی پەرلەمان."

 

پەرناز عەبدولمالیکی، زۆر هەستیارانە و سۆزداریانە کاردانەوەی هەبوو بەرامبەر بەو پرسیارە و فرمێسک لە چاوەکانی هاتە خوارەوە، " نازانم چی ڕوودەدات، نازانم....ژیان و گەنجیمان نەماوە...بەم شۆڕشە دڵخۆش بووین، کە چەند مانگێکە بێدەنگ بووە..."

 

وتی: "بیرکردنەوە لەوەی کە تەواوی تەمەنم لە ژێر دەسەڵاتی ئەم حکومەتە گەندەڵە بێت، ڕۆحم لەناو دەبات... نازانم چی بڵێم!"

ئەڤین یاشار دەرچووی کۆمەڵناسی وتی: " کاتێک لە سەردەمی ڕاپەڕین، تەنانەت یەک لەسەر سێی کۆمەڵگەش بە تەواوی نەهاتنە سەر شەقامەکان، وە کاتێکیش سەرکردایەتییەکی یەکگرتوو لەم ڕاپەڕینەدا نەبوو، ئۆپۆزسیۆن و ناڕازیانیش ناکۆکییان لەنێوان دروست بوو، بەو مانایەیە کە کۆمەڵگە هێشتا وەک پێویست ئامادە نییە بۆ شۆڕش."

 

بەبڕوای ئەو، کولتوور پرسێکی کاریگەرە و پێویستە گرنگی پێبدرێت، کارکردن لەسەر باوەڕ و بەها و نۆرمەکانی کۆمەڵگە یارمەتیدەر دەبێت بۆ قبوڵکردنی گۆڕانکارییە شۆڕشگێڕییەکان، هەروەها زیادبوونی متمانە بەخۆبوونی ژنان کە ئێستا زیاتر ئاگادارن و چاونەترسانە بەرەنگاری حیجابی زۆرەملێ دەبنەوە دەبێتە هۆی بەهێزبوونی شۆڕش، هەرچەندە ئەمە نابێتە تەنها دەستکەوتی شۆڕش".

 

باسی لە کوشتنی ژنان کرد: " کاتێک بەردەوام کوشتنی ژنان لە ژێر ناوی شەرەف لە کۆمەڵگە دەبینین، ئەوە مانای ئەوەیە کە پێویستە کار لەسەر گۆڕینی بیروباوەڕ و بەها و ڕەفتارەکانی کۆمەڵگا بکەین، لەسەر گرنگترین بابەتی وەک یاساکانی دژی ژنان کە کۆمەڵگە بەڕێوە دەبەن، زۆرێک لە ژنان بە ئاگاداری یان نائاگا قبوڵیان کردووە."

 

ئەڤین جەخت لەوە دەکاتەوە: "شۆڕش تەنیا بە گۆڕینی بیروباوەڕ و بەها ناتەقلیدییەکانی کۆمەڵگە و هەموارکردنەوەی یاساکانی دژ بە ژنان و سەرهەڵدانی شۆڕش بە سەرکردایەتییەکی یەکگرتووەوە بەدەست دێت."

 

نازەنین نیک ئەندیش، چالاکوانی بواری ژنان وتی: " پێم وایە شۆڕشی ژنان لە ژیانی ئازاددا هەنگاوی تۆکمەی ناوە، بەڵام هێشتا لە سەرەتایدایە، دەبێت هیوامان هەبێت و ئەم هیوایە بڕیارە لە شیکردنەوەی دروستی دۆخەکەوە دروست بێت، ئەوەی ڕوونە لە مێژووی هەموو گۆڕانکارییە گەورەکاندا دیکتاتۆرەکان تا دوا سات بەهێز دەردەکەون و جەماوەرەکەش پشتیوان و چەپڵە لێدەرن، بەڵام لە کۆتاییدا شکستیان هێناوە و کەوتوون."