هەڵەبجە

 

ئێوارەی دوێنێ لە باخی گشتی هەڵەبجە، بەڕێوەبەرایەتی گشتی ڕۆشنبیری و هونەر لە هەڵەبجە بە ئامادەبوونی ژمارەیەکی بەرچاو لە منداڵانی هەڵەبجە بە دروشمی "بە گۆرانی نەوەکانی دواڕۆژ ئاشنایی مافەکانیان دەکەین" و وتنەوەی گۆرانی و ئۆپەرێتی پەروەردەیی و ژینگەیی یادی ڕۆژی جیهانی منداڵان کرایەوە.

 

لە هەڵەبجە شوێنێکی شایستە نییە بۆ ئەوەی منداڵان کاتەکانی خۆیانی تێدا بەسەرببەن، لەو بارەیەوە، فرمێسک ئومێد، دایکی منداڵێکە و تایبەت بە نوژنها باسی لەوەکرد، ڕۆژی جیهانی منداڵان، ڕۆژێکی تایبەتە بە منداڵان، بەڵام بەداخەوە لە هەڵەبجە شوێنێک نییە تاوەکو منداڵەکان کاتی تێدا بەسەرببەن، دەربارەی چالاکییەکە وتیشی: هەبوونی ئەم جۆرە چالاکیانە وادەکات منداڵان چاو بکەنەوە و وریابن لە ئاست ئەرک و مافەکانیان.

 

"کارەکەمان تەنها لە هەڵەبجە نابی بەڵکو دەبرێتە تەوێڵە و سیروانیش"

سۆلان عەدنان، سەرپەرشتیاری ئاهەنگی ڕۆژی جیهانی منداڵان باسی لەوەکرد کە بەڕێوەبەرایەتی ڕۆشنبیری و هونەر بە ئەرکی خۆی دەزانێت کە لە خزمەت منداڵاندا بن و چالاکیەکە لە گۆرانی و ئوپەرێتی منداڵان پێکدێت، وتیشی: وا بڕیارە چالاکیەکان ببرێتە هەریەک لە شارۆچکەی تەوێڵە و بیارە، تاوەکو منداڵانی ئەوێش لەو چالاکیانە بێبەش نەبن.

 

ئێوارەی دوێنێ بە بۆنەی ڕۆژی جیهانی منداڵانەوە ئاهەنگی پیرۆزبایی لە شاری هەڵەبجە تاوەکو درەنگانێکی ئێوارە بەردەوام بوو.