HÊLÎN XWEBÛN

Îtalya – Damezrênera Foruma Rojnamevanên Jin yên Derya Spî Marilú Mastrogiovanni, rewşa dawî ya Sûriyê, êrişên dewleta Tirk ên li ser Bakur û Rojhilatê Sûriyê ji ajansa me re nirxand.

Marilu diyar kir yên ku bala xwe didin mafên mirovan û mafên jinan, îro meraq dikin ka dê li Sûriyê çi bibe û wiha got: “Modela rêxistina siyasî û civakî ya paşeroja Sûriyê dê çawa be, belkî jî ji bîr dikin ku modelek siyasî ya civakî ya nûjen ev 12 sal in ku heye, ew pêk tîne. Li bakur û rojhilatê Sûriyê, li Rojava, modela Konfederalîzma Demokratîk heye. Ev model li ser bingeha jiyana hevbeş a azad û aştiyane ya gelan û çandan, modela laîk li ser sê lingên demokrasî, azadiya jinê û ekolojiyê hatiye avakirin.”

‘Utopyayeke rasteqîn heye ku jê re dibêjin Rojava’

Marilu da zanîn ku dirûşma “Jin, jiyan, azadî, jin jiyan azadî” sembola vê ye. Marilu diyar kir ku  divê rêxistinek civakî û siyasî ya ji bo nûbûnek ji binî ve bê avakirin û wiha got: “Rêxistinek ku azadiya jinê di navendê de cih digire. Rêxistinek ku ji aliyê jinan ve û hem jî ji aliyê mêran ve hatiye avakirin ku bi hev re civakek ji baviksalarî rizgar bûyî ava dikin. Utopyayeke rasteqîn heye ku jê re dibêjin Rojava. Rêxistineke siyasî ya xweser, xewna azadiyê, rêxistinek ku her tişt li ser bingeha pedagojiya veguherîner a ji binî ve ye, rêxistinek ku jin di navendê de cih digire û rizgariya jinê ji her cure zordestiyê ye. Ew rêxistinek e ku li ser bingeha serokatiya dualî ye: hemî ofîs ji hêla mêr û jinek ve tên rêvebirin, her gav du kargeh hene. Li ser bingeha Jinêolojî, zanista jinê ye: modelek epîstemolojîk, lê di heman demê de şêwazek nû ya dîtina rastiyê bi çavên jinê ku heya niha nehatiye kirin.”

‘Modelek civakî ya ji bo Sûriyê ye’

Marilu destnîşan kir ku ji ber vê yekê pêwîstî bi modelek ji bo Sûriyê, modelek civakî û siyasî ya rêxistinek laîk, li ser bingeha jiyana hevbeş a aştiyane heye û wiha got: “Ew jî li hêlîna gelan û çandan ku Sûriye ye lê ez dibêjim Rojhilata Navîn, modeleke ku kar dike jixwe heye û îro di bin metirsiyê de ye. Li ser navê Foruma Rojnamegerên Jin ên Behra Spî em xemgîniyeke mezin tînin ziman. Ger ne tirsa ku dibe bila bibe, ji ber ku ji niha ve diqewime.”

‘Ji aliyê dewleta Tirk ve bi destê komên cîhadî û SNA’yê tên kirin’

Marilu diyar kir ku li Sûriyê komkujiyên etnîkî pêk tên û wiha berdewam kir: “Di serî de jinên tevgera azadiya jinên Rojava, hedefa balafirên bêmirov ên dewleta Tirk in. Navendên Kurdan hedef digirin. Ji ber vê yekê jî paqijiya etnîkî ji aliyê dewleta Tirk ve lê ji aliyê komên cîhadî û SNA ve tê kirin. Talankirin, wêrankirin, şewat, darên zeytûnan ji bo gelê Kurd çavkaniyeke girîng a debarê ne, bi taybetî dest avêtin bingehên etnîkî. Ji ber vê yekê em dilgiraniya xwe ya pir xurt tînin ziman. Em bi tevgera azadiya jinên Kurd re di nava piştevaniyê de ne û em hêvîdar in ku modela rêxistina civakî û siyasî ya Rojava bê parastin û bi rastî jî bibe modela referansê. Ne tenê ji bo Sûriyê ji bo Rojhilata Navîn jî.”