Navenda Nûçeyan- Malbata Rojnamevan û çalakvana mafê jinan Jîna Muderês Gorcî di hevpeyvînekê de têkildarî rewşa keça xwe de agahiyan parvekirin. Malbata Jîna diyar kir ku keça wan ji aliyê Dadgeha Îstînafê ya bajarê Sine ve, bi 2 sal û 4 meh cezayê girtîgehê hatiye mehkûmkirin.

Her wiha hate destnîşankirin ku cezayê wê, roja çarşemê ji aliyê şaxa çarem a Dadgeha Îstînafê ya Sine ve hat dayîn û ji parêzer re hat ragihandin.

Malbata Jîna diyar kir ku keça wan bi tometa ‘alîkariya komên muxalîf’ û ‘propagandaya li dijî dewletê’ hatiye cezakirin.

Hêjayî bi bîrxistinê ye ku di meha Hezîrana îsal de Dadgeha Şoreşê ya Sine li ser Rojnamevana Kurd û çalakvana mafê jinan Jîna Muderês Gorcî, 10 heta 21 sal cezayê girtîgehê sepand. Beriya niha jî di dema xwepêşandanên Şoreşa ‘Jin, Jiyan, Azadî’ de hatibû binçavkirin. Heta niha gelek caran runiştina dozê hate lidarxistin û cezayê wê hate nûkirin.