Enqere – Hate diyarkirin ku dê Rêberê Gelê Kurd Abdullah Ocalan, di Komîsyona Jêrîn a Bêçekkirin û Koordînasyona Stratejîk de cih bigire. Di nav Lijneya Çavdêrî û Nirxandinê ya ku di çarçoveya Pêvajoya Aştî û Civaka Demokratîk de hatiye damezrandin de ew jî dê bixebite. Her wiha hat destnîşankirin ku tê plankirin Komîsyona Jêrîn bê damezrandin ku li Tirkiye, Ewropa û Herêma Başûrê Kurdistanê di bin çavdêriya Abdullah Ocalan de bixebite.

Nîqaşên di nav Pêvajoya Aştî û Civaka Demokratîk de li ser gavên nû yên ku piştî qanûna çarçoveyî ya di 10’ê Tebaxê de ji hêla Parlamentoyê ve hatî derxistin bên avêtin, hatine kirin. Lijneya Çavdêrî û Nirxandinê ku di çarçoveya vê qanûnê de hatiye damezrandin, civîna xwe ya yekem di 24’ê Tebaxê de li dar xist.

Civîn di bin serokatiya Cîgirê Serokkomar Cevdet Yilmaz de, li Beştepeyê hate lidarxistin û Wezîrê Dadê Akın Gurlek, Wezîrê Karên Derve Hakan Fîdan, Wezîrê Karên Hundir Mustafa Çiftçi, Wezîrê Parastina Neteweyî Yaşar Guler, Serokê Rêxistina Îstîxbarata Neteweyî Îbrahîm Kalın, Sekreterê Giştî yê Serokkomariyê Hakkı Susmaz û Sekreterê Giştî yê Lijneya Ewlekariya Neteweyî Okay Memiş beşdar bûn.

Di civînê de, biryar hat dayîn ku Komîsyona Jêrîn a Koordînasyona Karûbarên Dadwerî û Hiqûqî, Komîsyona Jêrîn a Çavdêrî û Tesbîtkirinê, Komîsyona Jêrîn a Yekgirtina Civakî û Entegrasyonê û Komîsyona Jêrîn a Bêçekkirin û Koordînasyona Stratejîk bên avakirin.

Di civînê de her wiha prosedur û prensîbên ku di meşandin û birêvebirina karê komîteyan de bên şopandin hatin nîqaşkirin. Hate payîn ku komîteyên ku nû hatine damezrandin dê aliyên cuda yên pêvajoyê birêve bibin, hevrêz bikin û ji bo encamgirtina wan bixebitin.

Komîteyên ku li gorî warên xebata xwe hatine damezrandin, dê rayedarên wezaretê, burokrat û pisporên mijarê di nav xwe de bigirin. Komîte dê her wiha bi awayekî periyodîk kes û pirsgirêkên li derveyî çarçoveya yasaya çarçoveyî bişopînin û derbarê wan de biryaran bidin.

Abdullah Ocalan dê bibe endamê Komîsyona Jêrîn a Bêçekkirin û Koordînasyona Stratejîk

Li gorî agahiyên ku ji çavkaniyên Partiya DEM’ê hatine wergirtin, Rêberê Gelê Kurd Abdullah Ocalan dê bibe endamê Komîsyona Jêrîn a Bêçekkirin û Koordînasyona Stratejîk. Tê payîn ku komîteya ku Abdullah Ocalan jî di nav de ye, di pêvajoya bêçekkirinê de bi rêxistin û mekanîzmayên din re têkiliyeke rasterast û ragihandinê bidomîne.

Komîsyonek Jêrîn di bin Serokatiya Abdullah Ocalan de tê plankirin

Avakirina Komîsyona Jêrîn a di bin komîsyonan de jî di rojevê de ye. Li gorî agahiyên hatine bidestxistin, Komîsyonek Jêrîn di bin serokatiya Abdullah Ocalan de tê plankirin da ku bikaribe bighîje hemû qadên rêxistinî. Tê gotin ku ev komîsyon dê ji tîmekê pêk bê ku dê bi awayekî çalak li Herêma Başûrê Kurdistanê, Ewropa û Tirkiyeyê bixebite.

Çavkaniyan ragihandin ku ev mijar di civîna yekem a Lijneya Çavdêrî û Nirxandinê ku di 24’ê Tebaxê de pêk hat de, hatine nîqaşkirin û hûrgulî hatine zelalkirin.

Lijneya Rêveberiya Navendî ya Partiya DEM’ê dê bicive

Ji aliyê din ve, Lijneya Rêveberiya Navendî (MYK) ya Partiya DEM’ê jî dê sibê bicive. Tê payîn ku civîn pêşketinên dawî yên di pêvajoyê de, komîsyonên hatine avakirin û gavên nû yên ku bên avêtin, bi berfirehî binirxîne.