Navenda Nûçeyan – Li Sûdanê yek ji xetertirîn şêwazên binpêkirina mafên mirovan, tundiya zayendî ye. Aliyên pevçûnê wê wekî çekekî şer bikar tînin da ku sivîlan bitirsînin û tevna civakî hilweşînin. Li herêmên şer, êrîşên li ser jin û keçên ciwan zêde dibin û parastineke bi bandor jî tune ye.

Bûyereke nû li Umbada, Omdurmanê

Rojnameya Cezîre ya Mafên Mirovan, duh êvarê, bûyereke destavêtinê tomar kir. Keçeke 18 salî li herêma Umbada ya bajarê Omdurmanê ku yek ji bajarên herî mezin ên paytext Xartûmê rastî destdirêjiya zayendî hat. Li gorî daxuyaniya malbata keça ciwan ku rastî destdirêjiyê  hatiye, dema ku ji karê xwe yê ji xwaringehekê vedigeriyan, çar çekdaran rêya keçikê û dayîka wê girtin. Van çekdaran bi gefa çekê êrîşî keçikê kirin.

Şahidiya dayîkê û hûrgiliyên bûyerê

Dayîka keçikê got ku êrîşkar bi motorsîkletan hatibûn û li kolaneke tarî rêya wan girtin. Paşê wan bi dorê destdirêjî keçika wê kir û di wê demê de dayîkê jî şahidiya wê bûyerê kir.

Piştî bûyerê, keça ciwan a ku rastî destdirêjiyê hat, rakirin beşa jinan û zayînê ya Nexweşxaneya Umbadayê. Li wir tavilê destwerdana bijîşkî hat kirin û keçik hat muayenekirin. Her wiha, forma bijîşkî ya fermî (Ornîk 8) jê re hate derxistin da ku pêvajoya yasayî dest pê bike.

Muayeneya bijîşkî û nirxandina yasayî

Muayeneya bijîşkî piştrast kir ku keça ciwan rastî êrîşeke mezin a destdirêjiyê hatiye. Bikaranîna çekê, gef û hejmara êrîşkaran, rewşeke xeternak a zordarî û tundiya destdirêjiyê nîşan dide. Destavêtina ku bi pevçûna çekdarî ve girêdayî be, di bin şert û mercên diyarkirî de dikare bigihîje asta sûcekî şer an jî sûcekî li dijî mirovahiyê.

Banga ji bo parastinê û lêpirsînê

Çavdêriya Mafên Mirovan bal kişand ser pêwîstiya parastina kesên ku dibin hedef û şahidan ji tolhildanê û şermê, parastina delîlên bijîşkî û yasayî û dabînkirina lênerîna bijîşkî, derûnî û yasayî ya ewle û veşartî ya ji bo mexdûran. Her wiha hat xwestin ku rêz li taybetmendiya wê bê girtin û agahiyên ku nasnameya wê eşkere dikin, neyên belavkirin.

Her wiha, ji rayedar û aliyên pêwendîdar xwest ku lêpirsîneke lezgîn, serbixwe û bêalî bidin destpêkirin da ku nasnameya gumanbaran diyar bibe, têkiliya wan a bi hêzên hevbeş re bê kontrolkirin û her kesê ku berpirsyariya wî hate tespîtkirin li gorî yasayê bê darizandin, di nav de berpirsyariya serokatiyê jî heke şertên yasayî yên wê hebin.