Reqa – Kampanyaya ku ji aliyê tevger û rêxistinên jinan ên li herêma Bakur û Rojhilatê Sûriyeyê ve hate destpêkirin, li dijî her cûre tundî, cudakarî û vederkirina li dijî jinan, dengek hevpar û îradeyek kolektîf avakir.

Platforma Çalakiyên Hevbeş a Herêma Bakur û Rojhilatê Sûriyeyê, îro di çarçoveya bernameya 25’ê Mijdarê Roja Têkoşîna li dijî Tundiya li ser Jinan de, komxebatek bi dirûşma "Em bi hev re li dijî tundiyê civakeke demokratîk û komînal ava bikin" li bajarê Reqayê li dar xist. Bernameya çalakiyên 25’ê Mijdarê ku 15’ê Mijdarê dest pê kiribûn, bi vê komxebatê bi dawî bû.

Çalakvan, hiqûqnas, nûnerên tevgerên jinan û rêxistinên civaka sivîl, Desteya Jinan a Bakur û Rojhilatê Sûriyeyê û Hêzên Ewlekariya Hundirîn-Jin beşdarî komxebatê bûn.

Komxebat bi axaftina berdevka Kombûna Jinan a Zenûbiya Buşra Mihemed dest pê kir. Buşra Mihemed, li dijî tundiya li ser jinan banga mezinkirina têkoşîna hevpar a jinan û avakirina hişmendiyeke civakî kir ku karibe “guhertineke rasteqîn di civakê de çêbike û dawî li tundiyê bîne.”

Bernameya komxebatê bi deqeyek rêzgirtin dest pê kir. Piştre koma şanoyê ya Tevgera Hîlala Zêrîn şanoyek li ser tundiya li dijî jinan pêşkêş kir.

‘Dixwazin jinan sînordar bikin û bindest bikin’

Seroka Desteya Jinan a Rêveberiya Xweseriya Demokratîk a Herêma Bakur û Rojhilatê Edalet Omer, girîngiya lidarxistina mîna van çalakiyan vegot û wekî qadeke diylog û têkoşîna domdar a azadiya jinan bi nav kir.

Edalet Omer, bi domdarî got "Tevî zehmetiyan hewldanên jinan ranewestin. Serhildana jinan hîn jî li ser xeta Jin, Jiyan û Azadî berdewam dike. Rojhilata Navîn ku dergûşa şaristaniyan bû, hîn jî ji ber hebûna domdar a rejîmên zalim ên ku bi her awayî dixwazin jinan sînordar bikin û bindest bikin, êş dikişîne."

‘Dengê jinan li dijî hemû cûreyên zilm û serdestiyê yek e’

Edalet Omer, destnîşan kir ku azadî ji têgihiştina jinan bi hêz û mafên wan ve dest pê kir û doza domandina têkoşînê di hemû qadan de da.

Edalet Omer, têkoşîna jinên li Siwêda û peravê silav kir û wiha dawî li axaftina xwe anî "Dengê jinan li hemberî hemû cûryên zilm û serdestiyê yek e."

‘Tundiya li dijî jinan di navbera têgeh û rastiyê de’

Mijara yekemîn a komxebatê ya bi navê "Tundiya li dijî jinan di navbera têgeh û rastiyê de" ji aliyê endama Koordînasyona Kongra Star Jiyan Hisên ve hat şîrovekirin. Jiyanê cûreyên tundiyê û teyisndina wan di jiyana rojane de, tundiya ji ber urf û edetên şaş ên civakî vegotin. Jiyan anî ziman ku jihevxistina pergala baviksalar bingeha esasî ya pêkanîna edaleta civakê ye.

‘Tundiya li dijî jinan di nava tifaq û biryarên navneteweyî de’

Hevseroka Meclisa Edaleta Civakî ya Herêma Bakur û Rojhilatê Sûriyeyê Rîma Berekat mijara "tundiya li dijî jinan di nava tifaq û biryarên navneteweyî de’’ şîrove kir. Di vê mijarê de behsa peymanên navneteweyî yên parastina jinan û astengiyên li pêşiya wan vegot.

Encam û pêşniyarên forûmê

Platforma Çalakiyên Hevbeş, destnîşan kir ku jin ne tenê sî an jî girêdayî ne, di pêvajoyên berxwedan, avakirin û biryardanê de hevkarên bingehîn in. Her wiha hate diyar kirin ku dûrxistina jinê ya ji qadên siyasî û civakî, cureyekî cidî ya tundiyê ye.

Komxebat bi van armancan bi dawî bû:

*Divê ceza li ser kesên tundiyê li dijî jinan dikin were girankirin û jin bên parastin.

*Bi armanca sepandina nirxên wekhevî û rêzdariyê di tevahî saziyên perwerdeyê de divê minahcên perwerdeyê werin bipêşxistin.

*Bilindkirina hişmendiyê li ser xetereyên adet û kevneşopiyên zirardar, guhertina qalibên klasîk û pêşxistina çandeke bêtundî.

*Pêşvebirin û teşwîqkirina beşdariya jinan di xebata siyasî û aborî de wekî prensîbeke bingehîn ji bo avakirina civakeke demokratîk a hevseng.

*Xurtkirina rola rêxistinên civaka sivîl û beşdarkirina wan di hewldanên têkoşîna li dijî tundiyê û hişyarkirina civakê de.

*Perwerdekirina karmendên pispor ku pirsgirêkên tundiya psîkolojîk, qanûnî û civakî yên li dij jinan çareser bikin.

*Xurtkirina hevkarî û hemahengiyê di navbera hemû tevgerên jinan de û avakirina eniyeke jinan a yekgirtî da ku dengê jinan bigihîne qadên navneteweyî.

*Ji bo misogerkirina hawîrdorek ewle ji bo jinan û aktîvkirina mekanîzmayên parastinê di nav saziyan de xebata hiqûqî û mafên mirovan, şopandina karên hiqûqî û qanûnî.

*Bicîhanîna peymanên navneteweyî yên têkildarî mafên jinan.

*Têkoşîna li dijî tundiyê wekî hewldanek berdewam û domdar, bi rêya planên rêxistinkirî yên ku di tevahiya salê de dirêj dibin û ne wekî tedbîrek demkî were destnîşankirin.