Navenda Nûçeyan – Rojnameger Nazim Daştan û Cîhan Bîlgîn dema li Bakur û Rojhilatê Sûriyeyê geşedanên li herêmê dişopandin, di 19’ê Kanûnê de ji hêla dewleta tirk ve bi SÎHA’yan hatin qetilkirin. Ji roja hatin qetilkirin heta niha malbatên wan hewl didin cenazeyên zarokên xwe bînin û defin bikin. Lê tevî hemû hewldanan jî dewleta Tirk destûr neda.

Dewleta Tirk nehişt cenaze derbas bibin

Ji ewil ji malbatan re hate gotin ku dê cenazeyên rojnamegeran bînin Qamişloyê û ji Deriyê Sînor ê Nisêbîn a Mêrdînê radestî malbatan bên kirin. Li ser vê yekê malbat hatin ber Deriyê Sînor ê Qamişloyê lê cenaze nehatin dayin. Piştre jî hate destnîşankirin ku cenaze dê ji Deriyê Sînor ê Sêmalkayê ku di navbera Bakur û Rojhilatê Sûriyeyê û Başurê Kurdistanê de ye bên teslîmkirin. Li ser vê yekê malbatan di 6’ê Çileyê de xwestin ji Deriyê Sînor ê Xabûrê yê li Silopiya ya Şirnexê derbasî Başûr bibin. Lê şandeya ku malbat jî di nav de bû hate astengkirin. Li ser vê yekê şandeyê dest bi çalakiya nobetê kir. Nobet du rojan domiya lê dewleta Tirk destûr neda.

Hat zanîn ku dê cenazeyên Nazim Daştan û Cîhan Bîlgîn li bajarê Qamişloyê bên veşartin.