ÎMAN SEMÎR ELÎ

Misir – Di temenê 17 saliya xwe de, kişikvana Misrî Joy Romanî di cîhana lîstikê de navekî mezin çêkir. Tevî zehmetiyên ku di destpêkê de pê re rûbirû ma, bi taybetî ji ber pratîka kêm a kişikê û kêmbûna turnuvayan li Misira Jorîn, gelek serkeftin û şampiyonî bi dest xist.

Ji malbata xwe hînî kişikê bû

Têkiliya Joy Romanî bi kişikê re di temenê ciwaniyê de, piştî temaşekirina lîstika dê û bavê wê dest pê kir. Bavê wê bingehên lîstikê fêrî wê kir, zû şiyana wê ya ji bo têgihîştinê û fêrbûna wê ya bilez dît. Ev bû sedem ku ji tenê fêrbûna qaîdeyên lîstikê derbasî beşdarbûna pêşbirkan bibe.

Di 7 saliya xwe de beşdarî şampiyoniya neteweyî bû

Joy Romanî dibêje ku di temenê 7 saliya xwe de, beşdarî şampiyoniya neteweyî bûye û cihê yekem bi dest xistiye. Joy beşdariya li Şampiyoniya Efrîkayê heq kir. Di beşdariya xwe ya yekem de, wê cihê çaremîn bi dest xist. Ev xalek werçerxê bû ku wê motîve kir ku perwerdehiya xwe dijwartir bike û li ser baştirkirina jêhatiyên xwe bixebite. Paşê wê du caran di Şampiyoniya Efrîkayê de cihê yekem bi dest xist.

Joy Romanî da zanîn ku hilbijartina wê ya kişikê, girêdayî zayenda wê nebûye û destnîşan kir ku raman û şiyana pêşbaziyê cûdahî nake navbera mêr û jinan. Joy got: “Ya herî girîng ew e ku lîstikvanek dikare li ser tabloyê çi pêşkêş bike.”

Wê warên cûrbecûr keşif kir

Berî ku li ser kişikê bisekine, Joy di gelek dîsîplînên wek wênesazî, muzîk, piyano û şano de ceribandin kir. Joy heta du caran di pêşbirkeke wênesazî ya neteweyî de jî pileya yekem bi dest xist. Lê kişik ew qad bû ku wê hewesa xwe ya rastîn lê dît.

‘Têkçûn ji bo pêşketinê beşek girîng e’

Joy Romanî got ku “Tiştê ku ez herî zêde bala min kişand ser kişikê, rûbirûbûna bi lîstikvanên bihêz re bû. Her wiha hewl dayîna têkbirina wan, fêrbûna ka meriv çawa bi têkçûnê re mijûl dibe û ji holê radibe, bû.” Joy têkçûnê wek beşek girîng a rêwîtiya her lîstikvanek a ji bo pêşketinê, dibîne.

Bi rêwîtiyên dirêj re rûbirû dima

Rêwîtiyên dirêj ji bo jinek ciwan dijwar bûn. Hin rêwîtî bi trênê heta Qahîreyê nêzî 7 saetan û dema ku diçûn Port Saîdê jî heta 10 saetan didomandin. Rêwîtî her wiha tê wateya dûrketina ji bo demekê ji malbata wê. Carna difikirî ku dev ji lîstikê berde.

Piştgiriya malbatê faktorek girîng e

Joy Romanî eşkere kir ku bavê wê bi giranî li ser aliyên teknîkî û perwerdê disekine, di heman demê de dayîk, xwişk û dapîra wê çavkaniya piştgiriya psîkolojîk a wê bûne. Ev piştgirî di şiyana wê de bû ku piştî windakirina maçên girîng kêliyên bêhêvîbûn û bêhêvîtiyê derbas bike.

Joy Romanî bawer dike ku serkeftina di kişikê de ne tenê bi jêhatîbûna teknîkî ve girêdayî ye. Dibêje ku her wiha bi şiyana lîstikvanek ve jî girêdayî ye ku hestên xwe kontrol bike û bi zext û têkçûnê re mijûl bibe.

Rêya şampiyoniyan bêyî kêliyên dijwar nabe

Ezmûna Joy Romanî xuya dike ku rêya şampiyoniyan bêyî kêliyên dijwar nabe û hebûna malbatê li kêleka lîstikvanek dikare di serkeftina wan a berdewam de bibe hêmanek bingehîn. Bi taybetî dema ku windakirin piştî demek dirêj a hewildan û hêviyên bilind tê.

 Îro, Joy Romanî rêwîtiya xwe ya di kişikê de didomîne û ezmûnek ku li Misira Jorîn dest pê kiriye bi xwe re tîne. Ezmûnek ku di wê demê de wê nebûna turnuvayan, zehmetiya rêwîtiyê û dijwariyên psîkolojîk derbas kir. Ji bo ku bighîje asta pêşbirkê ya li ser astên welatên Ereb û Efrîkayê û madalya û serkeftinên cûrbecûr bi dest bixe, li ber xwe da.