Qamişlo – Dewleta tirk îro danê nîvro, li ser rêya gundê Beyandorê erebeyek kir armanc û di encamê de yek birîndar sê kes jî jiyana xwe ji dest da. Rêveberiya Xweser di derbarê bûyerê de daxuyaniyek çapemenî da û da zanîn ku Endamên wan Hevseroka Meclîsa Kantona Qamişlo ya Bakur û Rojhilatê Sûriyê Yûsra Derwîş, cigîra wê Leman Şiwêş û welatiya bi navê Firat Tûmo jiyana xwe ji dest dane û Hevserokê Meclîsa Kantona Qamişlo ya Bakur û Rojhilatê Sûriyê Gobî Şemûn birîndar bûye.

Di daxuyaniyê de bal li ser êrişên dewleta Tirk a li ser heremê hat kişandin û wiha hat gotin; “Siyaseta hedefgirtinê ya ku dagirkeriya tirk pêk tîne, eşkere bûye ku projeya Rêveberiya xweser armanc digire. Her wiha karmend û xebatkarên saziyên Rêveberiya Xweser yên ku li ser esasê xizmetkirina pêkhateyên herêmê û dabînkirina ewlehî û aramiyê pêk tînin hedef digire. Ev hedefgirtin di demek wiha de pêk hat ku dadgehkirina çeteyên DAIŞ’ê di rojevê de bû. Em wek Rêveberiya Xweser herdem armanca me ew e ku em ji bo qeyrana Sûriyê çareseriyan çêkin, lê bi van êrîşan diyar dibe ku aliyên herêmî û navdewletî hene ku naxwazin ev qeyran were çareserkirin.

Em wek Meclîsa Rêveber a Rêveberiya Xweser a Herêma Cizîrê di serî de ji malbatên şehîdan û gelê xwe re sersaxî dixwazin. Tevî êrîş û terora dewleta tirk û çeteyên wê, em ê riya xwe ji bo parastina destkeftiyên gelê xwe temam bikin. Her wiha em bang li hêzên navneteweyî dikin ku berpirsiyariyên xwe bi cih bînin û li dijî terora dewleta tirk a dagirker bisekinin. Em ji şehîdên xwe re rehmet û ji birîndarên xwe re şifayê lezgîn dixwazin.”