Riha – Xizm û parazvanên Parlamenterê AKP’ê yê Rihayê Îbrahîm Halîl Yildiz di 14’ê hezîrana 2018’an de li navçeya Pirsûs a Rihayê êrişî Malbata Şenyaşar kir. Di encama êrişê de hevjîn û du kurên Emîne Şenyaşar hatin qetilkirin. Li ser vê yekê Emîne Şenyaşar û kurê wê Ferît Şenyaşar di 9’ê adara 2021’an de li pêşiya Edliyeya Rihayê dest bi çalakiya Nobeta Edaletê kirin. Çalakiya Malbata Şenyaşar di roja 741’an de berdewam dike.

Ji ber ku edliye di dawiya hefteyê de nayê vekirin, malbatê çalakî li mala xwe ya Pirsûsê domand. 

‘Divê em vê pergalê biguherînin’

Malbatê, têkildarî çalakiyê li ser hesaba xwe ya medyaya civakî ev peyam parve kir: “Şert û merc çiqas giran dibin bila bibin, divê em vê pergala ku darazê weke ço di destê xwe de bi kar tîne biguherînin. Pêdiviya me çiqas bi av û hewa hebe, ewqas jî bo azadî, wekhevî û edaletê heye. Em ê bi hev re demokrasî û edaletê bînin vî welatî.”