Navenda Nûçeyan- Komeleyên Dêrsimê yên Îzmîrê, Platforma Hawirdor û Çanda Egeyê (EGEÇEP), Şaxa Komeleya Mafên Mirovan (ÎHD) a Îzmîrê, Komeleyên Xwaringeha Demokratîk (DAD) a Îzmîrê û Federasyona Elewî û Bektaşiyan (ABF) ya Îzmîrê, li dijî projeyên madenan ên tê xwestin li Dêrsimê bikevin meriyetê û talana ekolojîk a li Tirkiye û Kurdistanê didome, civîneke çapemeniyê li dar xistin.

Li ser navê saziyan metneke hevpar ji aliyê hevserokê Komeleya Çand û Piştevaniyê ya Dêrsimê Hasan Alî Kiliç ve hat xwendin.

Di daxuyaniyê de hat diyarkirin ku ev demeke dirêj e Dêrsim bi projeyên bendavan, şewatên daristanan û valakirina bi darê zorê ya gundan hedef tê girtin û hat diyarkirin ku niha jî tê xwestin erdnîgariya Dêrsimê bi 145 projeyên kanên madenê bê texrîbkirin. Di daxuyaniyê de wiha hat gotin: “Tevahiya Çiyayê Munzurê weke qada madenê hatiye ragihandin. Dixwazin li vir texrîbateke mezin çêbikin. Xelkê gundên Sari Saltik, Alîbogazi û Dervî Cemal jî li dijî vê bertek nîşan didin û li benda piştevaniyê ne.”

‘Dev ji polîtîkayên şer berdin’

Di daxuyaniya ku hat diyarkirin bi sedan salan e Dêrsim dorpêçkirî ye de wiha hat gotin: “Çavkaniyên binerd û sererd tên talankirin û xelkê wê neçarî xizaniyê tê kirin. Em li vir bang dikin û dibêjin dev ji projeyên madenê yên li Dêrsimê, biradin û şewitandina daristanan û projeyên bendavan berdin. Polîtîkayên şer jî rê li ber qirkirina ekolojiyê û xwezayê vedikin, xizanî û hejariyê kûrtir dikin. Em dixwazin ev jî bên terikandin.”

Banga têkoşîna hevpar

Piştî civîna çapemeniyê Rêvebera EGEÇEP’ê Derya Lîm jî li dijî qirkirina ekolojî û xwezayê ya ji çiyayên Îdayê (Kaz) heta Cûdî û Dêrsimê, banga têkoşîna hevpar kir. Sekreterê Giştî yê DAD’ê Asîl Benler jî ji ber qirkirina xweza û çandî ya li Dêrsimê hişyarî kir.