Navenda Nûçeyan – Jiyan Ateş di sala 2012'yan de hatibû girtin, piştî 13 salan ji Girtîgeha Jinan a Sîncanê hat berdan. Jiyan Ateş a ku 8 caran ji aliyê Desteya Rêveber û Çavdêriyê ve serbestberdana wê hate taloqkirin ji aliyê malbatê, DEM Partiyê û parêzeran ve hat pêşwazîkirin.  

Jiyan Ateş anî ziman ku her çend di sala 2021’an de cezayê wê qediya jî ji aliyê heyetê ve 3 sal û nîv cezayê wê hatiye dirêjkirin û got, “Ev polîtîka bi taybetî li Girtîgeha Sîncanê tê meşandin. Em di nav kesên pêşî de bûn ku di vê yekê de hatin girtin. Ji ber ku weke herêma pîlot hat hilbijartin, jixwe li her derê êriş li jinan tê kirin. Em van weke polîtîkayên taybet şîrove dikin û niha li girtîgehan li dijî jinan tê kirin. Girtîgeha Jinan a Sîncanê di warê girtîgehên jinan de hema bêje yekane ye, li gorî min divê bal were kişandin."