Navenda Nûçeyan – Yekîtiya Jinên Elewî yên Demokratîk (DAKB) bi wesîleya salvegera 3’yan a qetilkirina jina ciwan a Kurd Jîna Emînî ya ji dewleta Îranê ve, daxuyanî da. 

DAKB’ê daxuyaniyek nivîskî da û bi bîr xist ku beriya 3 salan polîsên exlaq Jîna Emînî qetil kir û daxuyanî wiha dom kir: "Mirina wê di têkoşîna azadiyê ya jinan de bûye xaleke werçerxê ya dîrokî. Qêrîna ‘Jin, Jiyan, Azadî’ ya li pey wê bilind bû, li Rojhilatê Kurdistanê belavî tevahî cîhanê bû û veguherî serhildana hevpar a jinan. 

Piştî qetilkirina Jîna Emînî serhildaneke bêhempa destpê kir û piştre zext jî zêde bûn. Tenê di meha Îlonê de 4 jin jî di nav de 92 kes hatin îdamkirin.” 

Îro Şerîfe Muhammedî, Pexşan Ezîzî, Werîşe Muradî û Nasim Gholami Simiyarî yên bi xeteriya îdamê tên darizandin, bûne sembola vê têkoşînê.

Serhildana 'Jin, Jiyan, Azadî' veguheriye meşaleyeke azadiyê ku ti carî navemire. Weke DAKB di şexsê Jîna de em xwedî li têkoşîna hemû jinên hatine qetilkirin derdikevin. Azadiya jinan azadiya gelan e. Em bang dikin ku li dijî her cure zext, tundî û politikaya îdamê piştevaniya jinan û têkoşîna wekheviyê ya gelan were mezinkirin.”