Kobanê- Duh li bajarê Qamişlo yê kantona Cizîrê di wesayîta malbatekê de teqîn pêk hat. Di encama teqîna ku li li kêlek navenda Poste û Peywendiyan ya taxa Enteriyê rû da de, Xalîde Mihemed Şerîf ya 40 salî û kurê wê Hejar Ednan Silêman jiyana xwe ji dest dan.

Li dijî êrîş, bombebaran û bi taybet bûyera ku duh li Qamişo pêk hat, îroj bi sedan ji şêniyên bajarê Kobanê yên ji pêkhateyên Ereb û Kurd bi pêşengiya rêxistina jinan Kongreya Star meşiyan. Di meşa ku Rêveberiya Xweser, malbatên şehîdan, ciwan, partiyên siyasî, saziyên civak sivîl û hwd amedebûn, jinan bê navber hêrsa xwe bi berzkirina silogana “Jin, Jiyan, Azadî” nîşan dan.

Meşa ku di bin silogana “Bi îradeya jinên azad, em ê dawî li polîtîkayên qirkirin û dagirkeriyê bînin” hat birêxistinkirin bi hilgirtina posterên Rêberê Gelê Kurd Abdullah Ocalan, alên Kongra Star, wêneyên rojnemevan Gulîstan Tara û Hêro Bihadîn, Xalîde Şerîf û Hejar Ednan ji qada Jina Azad destpê kir û li gel qada Aştiyê jî rawestiya.

Piştî deqeyek rêzgirtin û berzkirina siloganên “Şehîd Namirin” berdevka koordînasyona Kongra Star Zozan Bekirî axivî.

‘Bi Jin, Jiyan, Azadî em ê azadiyê misoger bikin’

Zozan Bekir sersaxî ji malbata kesên di êrîşa Qamişlo de jiyana xwe ji dest dane re xwest û got: “Jinên ku ji aliyê dewleta tirk ve bi zanebûn tên hedefgirtin, wê tu carî ked û têkoşîna wan nîvço nemîne û dê bi ked, hevgirtin û vîna jinan ya di bin sîwana felsefeya Jin, Jiyan, Azadî de kom dibe bigihêje serkefinê. Heta ku azadiya jin û civakê misoger nebe û komkujiyên bi ser gelê me de ranewestin wê dayîkên weke Xalîde û têkoşerên weke Gulîstan Tara û hevriyên wê hebin û li berxwe bidin.”

Zozan wiha domand: “Dewleta tirk dubare, dubare komkujiyan li ser jin, malbat û zarokan de pêk tîne. Em ji van poltîkeyên dewleta tirk ya dagirker ne xerîbin, lewra li beramberî vê yekê ya ku di vê pêvajoyê de pêwîst dike, helwesteke hevbeş ya jinan û civaka me ye. Îro bi armancgirtina jinên ku xwe bi bîrdoziya Rêber Apo pêçandin û rêxistinkirin, Rêber Apo tê hedefgirtin.”

‘Jin di asta gerdûnî de bersiva qirkirina jinan didin’

Zozan Bekir peyan û helwesta  jinên Kobanê û yên Bakûr û Rojhilatê Sûriyê wiha bilêv kir: “Peyam û sekna me ya li hember van lihevkirin û êrîşan zelal e. Em ê tu carî ji bo van êrîşên tirsonek gavan şûnda navêjin û dest ji destkeftiyên xwe bernedin. Şoreşa Rojavayê Kurdistanê ku bi ked, têkoşîn û vîna gelê me pêşket, emê ji dewleta tirk re nehêlin. Bi taybet jî felsefeya Jin, jiyan, azadî ku bûye gerdûnî û bi deh hezaran jin di têkoşîna xwe de bingeh digirin, wê lewaz nebe û mezintir bibe. Lewra ev sekna jinan ya îro bersiva herî mezin ya li dijî dagirkerî û qirkirina ku li ser jinan de pêk tê ye.”