Tişrîn – Nobeta gel a li dijî êrişên dewleta Tirk û çeteyên wî yê li ser Bendava Tişrînê didome. Îro dewleta Tirk cara sêyemîn êrişî nobetdarên bendavê kir.

Rêveberiya Xweseriya Demokratîk a Herêma Bakur û Rojhilatê Sûriyeyê têkildarî êrişa dijî Bendava Tişrînê daxuyaniyek da.

Di daxuyaniya Rêveberiya Xweser de hat gotin ku dewleta Tirk a dagirker careke din kombûna siîvlan a li Bendava Tişrînê hedef girt û di encama vê êrişa yekser li dijî sivîlan de 4 nobedarên li bendavê jiyana xwe ji dest dan û 15 jî birîndar bûn.

Êrişa li ser ambulansê

Balafireke bêmirov a dewleta Tirk ambulansa Heyva Sor a Kurd ku tê de birîndarên êrişa Bendava Tişrînê hebûn bombebaran kir.

Hat diyarkirin ku ambulansa Heyva Sor a Kurdî birîndaran radikirin nexweşxaneya Tebqayê.