Mexmûr – Çalakiya Nobetê ya li wargeha penaberan a Şehîd Rustem Cûdî (Mexmûr) ku di 20’ê Tîrmeha 2023’an de ji bo azadiya fîzîkî ya Rêberê Gelê Kurd Abdullah Ocalan hatibû destpêkirin, bi dewirgirtina koma 169’emîn, di roja xwe ya 865’an de didome.

Beriya ku çalakî were dewirgirtin ji bo tevahî cangoriyên azadiya Kurdistanê deqeyek rêz hat girtin. Piştî rêzgirtinê li ser navê koma 168’emîn Elî Ziravîkî axivî.

‘Heta azadiya fîzîkî ya Rêber Apo mîsoger nebe çalakiya me yê bidome’

Elî Ziravîkî di destpêka axaftina xwe de li ser salvegera 47’emîn ya cejna berxwedanê ya 27’ê Mijdarê axivî û wiha got: “Ez cejna berxwedanê di destpêkê de li Rêber Apo, şervanên azadiyê, girtiyên azadiyê û gelê welatparêz pîroz dikim. Çalakiya ji bo azadiya fîzîkî ya Rêber Apo ya di pêşengtiya Meclîsa Îştar de hatî destpêkirin ev du sale zêdetire didome û heta azadiya fîzîkî ya Rêber Apo mîsoger nebe çalakiya me yê bidome. Pêvajoya aştiyê ya 27’ê Sibatê ku ji alyê Rêber Apo ve hatî destpêkirin 9 mehê xwe tijî kir û ji aliyê tevgera azadiyê ve jî gavên pir erênî hatin avêtin. Feqet ji alyê dewletê ve derveyî hevdîtina bi Rêber Apo tu gavên dîtir nehatin avêtin.”

‘Em hêvî dikin sala 2026 bibe sala azadiya Rêber Apo û Kurdistanê”    

Elî Ziravîkî di dawiya axaftina xwe de ji giştî gelê Kurd re bangavazî kir û wiha dawî li axaftina xwe anî: “Em bang li gelê Kurd ê çar parçeyên Kurdistanê û Ewropa dikin ku çalakiyên xwe yên demokratîk di asta herî jor de pêk bînin ku em deste Rêber Apo xurt bikin û dewleta Tirk neçar bikin ku gavên erênî bavêje. Em hêvî dikin ku sala 2026 bibe sala azadiya fîzîkî ya Rêber Apo û Kurdistanê.”     

Merasîm bi dewirgirtina koma 169’emîn û dirûşmeyan dawî bû.