NORŞÎN ABDÎ

Kobanê – Di 9’ê Çileya 2013’an de li paytexta Fransa Parîsê, yek ji damezrînerên PKK’ê û pêşengên Tevgera Azadiya Jinên Kurd Sakîne Cansiz (Sara), Nûnera Kongreya Neteweyî ya Kurdistanê (KNK) ya Parîsê Fîdan Dogan (Rojbîn) û Endama Tevgera Ciwanên Kurd Leyla Şaylemez (Ronahî) hat qetilkirin. Di 23’ê Kanûna 2022’an nezî dîroka nêzbûna salvegera 10’emîn a  komkojiya Parîsê de li heman bajar komkujiyeke din hat jiyîn. Di  komkojiyê de Endama Konseya Rêveber a KCK'ê û di heman demê de yek ji pêşengên tevgera jinên Kurd Evîn Goyî (Emîne Kara), ji Tevgera Çandê Mîr Perwer (Mehmet Şîrîn Aydin) û welatparêzê Kurd Abdurrahman Kizil hat qetilkirin.

Endama Koordînasyona Kongreya Star a Rêveberiya Xweser a Bakur û Rojhilatê Sûriyê Zozan Bekir, komkojiyên li Parîsê hatin jiyîn nirxand.

'Ji bo azadiya gel li ber xwe da'

Zozan Bekir ya der barê 1’emîn Komkujiya Parîsê ya ku Sakîne Cansiz, Fîdan Dogan û Leyla Şaylemez hatin qetilkirin û 2’emîn Komkujiya Parîsê ya ku Evîn Goyî hat qetilkirin de axivî, diyar kir ku tê îdiakirin ku kiryar di girtîgehê de jiyana xwe ji dest daye û bûyer hêj nehatiye zelal kirin. Zozan Bekir anî ziman ku ji ber ku ev bûyer hat ronîkirin û ji berpirsyaran hesab nehat pirsîn, 10 sal şûnde dîsa li Parîsê komkujiya duyemîn pêk hat û li vir Evîn Goyî hat qetilkirin.

Zozan Bekir diyar kir ku her 4 jinên şoreşger ên di komkojiyê 1’emîn û 2’emîn yên Parîsê de jiyana xwe ji dest dan, ji bo azadiya jinê dîrokeke dewlemend a berxwedanê afirandin û wiha axivî: "Sakîne Cansiz heta nefesa xwe ya dawî têkoşiya û li ber xwe da. Bi vê wateyê ji me re mîrasek berxwedanê hişt. Sakîne Cansiz yek ji jinên ewil e ku tevlî PKK'ê bûye û ji bo azadiya gelan têdikoşiya ye. Sakîne Cansiz bû ewil jina ku li hemberî bêedaletî û koletiya di civakê de serî rakir.”

'Têkoşîna wan ji şoreşa me bû şewq’

Zozan Bekir bal kişand ku di destpêkirin û pêşketina Şoreşa Rojava ya weke şoreşek jinê de bandoreke mezin ya sekna Sakîne Cansiz a têkoşîn û jina azad heye û wiha got: "Em weke jinên Rojavayê Kurdistanê deyndarê Sakîne Cansiz û bi hezaran şehîdên Tevgera Azadiya Jinê ne. Têkoşîna ku ew meşandin ji têkoşîn û şoreşa me re bû şewq. Jinên li herêma me di aliyê fikir, berxwedan, têkoşîn û felsefeyê de xwedî nasnameyeke ku li cîhanê tê naskirin û ji têkoşîna jina azad avadibe ye. Îro gavên ku em weke jinên di qada Rêveberiya Xweser a Bakur û Rojhilatê Sûriyê de diavêjin jî girîng in. Hevala Evîn Goyî ji şoreşa me ra wek pratîk jî ked mezin daye. Têkoşîna me ji bo hin zêdetir pêşxistina şoreşa me, mayîndekirina destkeftiyên xwe û tolhilgirtina şehîdan didome.”

Jinan bi dirûşma 'Jin, Jiyan, Azadî' rabûn li ser piyan

Zozan Bekir a bal kişand jinên ku bi şoreşa Rojava re bi dirûşma 'Jin, jiyan, azadî' rabûn li piyan, li dijî bêedaletî û dagirkeriyê li ber xwe didin, bi van gotinan dawî li axaftina xwe anî: “Îro li Îranê bi qetilkirina Jîna Emînî jinan li hemû cîhanê bi dirûşma 'Jin, 'Jiyan Azadî' li ber xwe didin. Dewleta Tirk li Bakur, Başûr, Rojavayê Kurdistanê, Bakur û Rojhilatê Sûriyê û derveyî welat hewl dide bi hedef girtina jinan şoreşê tasfiye bike, li Rojhilatê Kurdistanê jî dewleta Îranê bi qetilkirin, girtin û revandina jinan hewl dide serhildan û şoreşên wan bitepisîne. Lêbelê em wek jinan bi biryar in ku sedsala 21’an bikin sedsala azadiya hemû jinan. Bi vî awayî em ê layiqî bi sedan şehîdên xwe yên ji bo azadiya me canê xwe feda kirine bibin û heta nefesa xwe ya dawî şopdarên rêya wan bin.”